Rossiyadagi o‘zbekistonlik talabalar koronavirusga chalinganini yashirgani uchun o‘qishdan haydalishi mumkin

Sankt-Peterburg davlat temiryo‘llari universitetida tahsil olayotgan o‘zbekistonlik talabalar koronavirus infeksiyasini yuqtirib olishgani haqidagi ma’lumotni sir tutgani ma’lum bo‘ldi. Bu haqda universitet matbuot xizmati xabar berdi.

“Ko‘rsatilgan talablar va tavsiyalarga rioya qilmaslik natijasida 7a yotoqxonada yashovchi O‘zbekistondan bo‘lgan bir qator aspirantlar va talabalar kasallikni yuqtirib olishgan. Koronavirusga testni mustaqil ravishda topshirib, ular universitet ma’muriyati, yotoqxona rahbarini bu haqda xabardor qilmagan, natijada yotoqxonada yashovchi boshqa talabalardan keyin, oxirgi bo‘lib izolyatsiyaga joylashtirilgan”, — deyiladi xabarda.

Bundan tashqari, ma’muriyatning talabalar turar joyida yashash tartibiga rioya qilish talablariga qaramay, talabalar o‘z-o‘zini izolyatsiya qilish sharoitida uni bir necha bor buzgan.

“Natijada o‘zbekistonlik qator talabalar tomonidan sanitariya-epidemiologiya talablarini qo‘pol ravishda buzish boshqa talabalar va universitet xodimlariga xavf tug‘dirgan, bu holat universitetning tezkor shtab yig‘ilishida ko‘rib chiqildi. Tezkor shtab, fakultetlar va xalqaro aloqalar bo‘limi rahbariyati qarori bilan universitet rektoriga talabalarni yotoqxonada yashash qoidalarini, universitetning mahalliy aktlarini buzganligi uchun o‘qishdan chetlatish masalasini ko‘rib chiqish to‘g‘risida iltimosnoma yuborildi”, — deyiladi OTM xabarida.

Avvalroq karantin sababli Rossiyadagi 1000 nafardan ortiq o‘zbekistonlik talabaga yordam ko‘rsatilgani haqida xabar berilgandi.

Eslatib o‘tamiz, Rossiyadagi o‘zbekistonliklarni vatanga qaytarish uchun 25-maydan 7-iyunga qadar Yekaterinburg, Moskva, Sankt-Peterburg, Rostov-Don va Novosibirsk shaharlaridan yana yangi charter reyslar amalga oshiriladi.