“Yo‘lda samokatda uchib ketayotgan qizni tepib, yiqitib yana ustidan mag‘rurlanib kulishgani yetmagandek, buni Instagram tarmoqlariga joylashibdi” izohi ostida qoldirilgan videolavha ijtimoiy tarmoqlarda keng muhokamaga sabab bo‘ldi. Navoiy shahar IIBning xabar berishicha, tezkor xodimlar tomonidan voqea jarayoni batafsil o‘rganilib, yigitlar shaxsiga oydinlik kiritildi.
Ma’lum bo‘lishicha, 2003-yilda tug‘ilgan, Navoiy shahridagi Mirzo Ulug‘bek ko‘chasida istiqomat qiluvchi J. yonma-yon qo‘shnisi, 2003-yilda tug‘ilgan A. ismli qiz bilan tengdoshligi sababli oldindan o‘zaro hazil-huzul qilib, bir-biri bilan do‘stona munosabatda bo‘lgan.
Biroq noo‘rin va me’yordan oshgan hazilning oxiri xunuk ko‘ngilsizlik bilan tugagan. J. tanishlari — 1998-yilda tug‘ilgan Sh. hamda 1999-yilda tug‘ilgan R. bilan ko‘chada sayr qilib yurgan vaqtda do‘stlariga o‘zini ko‘z-ko‘z etish maqsadida A.ning samokatda kelayotganidan foydalanib, yo‘lto‘sarlik qilgan hamda hazil tariqasida oyoq ko‘targanida zarba tegmasada A. qo‘rquv ostida samokatdan yiqilgan.
Paytdan foydalangan R. ushbu jarayonni tasvirga olib, ijtimoiy tarmoqlar orqali keng jamoatchilikka tarqalishida sababchi bo‘lgan. Navoiy viloyat sud tibbiyot ekspertiza xulosasiga ko‘ra, A.ning yiqilishi oqibatida chap oyog‘ining tizza qismiga 1,5x1 santimetr hajmda terisiga yengil shikast yetkazilgan.
Ma’muriy ishlar bo‘yicha Navoiy shahar sudi qaroriga ko‘ra, qoidabuzar Sh. hamda R. Ma’muriy javobgarlik to‘g‘risidagi kodeksning 183-moddasidagi (Mayda bezorilik) huquqbuzarlikni sodir etganlikda aybli deb topilib, eng kam ish haqining 5 baravari miqdorida jarima jazosi tayinlangan.
J.ning voyaga yetmaganligi inobatga olinib, otasi M.ga nisbatan Ma’muriy javobgarlik to‘g‘risidagi kodeksning 47-moddasi (Bolalarni tarbiyalash va ularga ta’lim berish borasidagi majburiyatlarni bajarmaslik)ga ko‘ra, voyaga yetmagan farzand tarbiyasida befarqligi inobatga olinib, eng kam ish haqining 5 baravari miqdorida jarima jazosi tayinlangan.
Izoh (0)