Sankt-Peterburgdagi avtoservislardan birida tanishlari bilan tug‘ilgan kunni nishonlagan o‘zbekistonlik migrant o‘ldirildi, deb yozmoqda “78.ru”.
Voqea guvohlarining aytishicha, kechasi tug‘ilgan kunni nishonlagan erkaklarning 3 nafari nimadandir tortishib qolgan. Oqibatda ulardan biri boshiga bolg‘a urilishidan vafot etgan.
Huquq tartibot idoralarining ma’lum qilishicha, 24-may kuni soat 23:30 da Uralsk ko‘chasidagi uylarning yonida odam jasadi yotgani haqida xabar kelib tushgan. Voqea joyiga zudlik bilan yetib kelgan tezkor guruh uning boshiga tan jarohati yetkazilganini, u Rossiyaga fevral oyida ish qidirib kelgan 39 yoshli O‘zbekiston fuqarosi ekanini aniqlagan.
Jinoyat sodir etganlikda gumonlanib uning 3 nafar vatandoshi qo‘lga olingan. Ayni paytda jinoiy ish qo‘zg‘atish masalasi ko‘rib chiqilmoqda.
Bundan avvalroq Peterburgda odam o‘g‘irlaganlikda gumonlanib 3 nafar o‘zbekistonlik qo‘lga olingani xabar berilgan edi.
Izoh (0)