Samarqand viloyatining Paxtachi tumanida yashovchi 3 yildan buyon I guruh nogironi, surunkali buyrak yetishmovchiligi va anemiya og‘ir darajasi tashxisi bilan dispanser nazoratida turgan, 2017-yildan buyon doimiy gemodializ muolajasini olib kelgan 63 yoshli bemor 2020-yilning 19-may kuni viloyat ko‘p tarmoqli tibbiyot markaziga og‘ir ahvolda yotqizilgan, deya xabar bermoqda Sog‘liqni saqlash vazirligi.
Ma’lum qilinishicha, o‘tkazilgan tahlillar natijasida bemorda COVID-19 infeksiyasi tasdiqlangan. 25-may, dushanba kuni bemorning ahvoli yomonlashgan, burundan va ichki qon ketish belgilari paydo bo‘lgan va reanimatsiya bo‘limiga olingan. Bo‘limda bemorga shifokorlar tomonidan belgilangan standartlar asosida reanimatsion yordam ko‘rsatilgan.
Mavzuga doir: O‘zbekistonda koronavirusga chalinish holatlari 9 taga ko‘paydi. Kasallanganlarning umumiy soni 3290 nafarga yetdi
Biroq ko‘rsatilgan reanimatsion muolajalarga qaramasdan sun’iy nafas oldirish apparatida bo‘lgan bemor o‘tkir nafas va yurak qon-tomir yetishmovchiligidan vafot etgan.
Bungacha
- 27-mart kuni Namangan viloyatida Umradan qaytgan qizidan koronavirus yuqtirib olgan 72 yoshli onaxon miokard infarktidan (uning janozasida qarindoshlaridan hech kim ishtirok etmagan);
- 28-mart kuni Toshkent shahrida o‘zini uyda davolashga uringan 39 yoshli (erkak) shifokor koronavirus infeksiyasidan;
- 7-aprel kuni koronavirusga chalingan 40 yoshli erkak yurak va o‘pka yetishmovchiligidan;
- 11-aprel kuni esa xorij safaridan koronavirusga chalinib qaytgan farg‘onalik 59 yoshli ayol o‘tkir respirator distress sindrom, o‘tkir nafas yetishmovchiligi hamda o‘pka-yurak yetishmovchiligi oqibatida;
- 14-aprel kuni Namangan shahrida yashovchi 73 yoshli Sh. yurak qon-tomir yetishmovchiligidan;
- 18-aprel kuni Toshkent shahrida 77 yoshli ayol koronavirus infeksiyasi asoratlari — ikki tomonlama bronxopnevmoniyaning og‘ir kechishi, o‘tkir nafas yetishmovchiligi va o‘pka shishidan;
- 22-aprel kuni Namangan shahrida yashovchi 54 yoshli bemor (ayol) o‘tkir nafas va yurak qon-tomir yetishmovchiligidan;
- 24-aprel kuni Angrenda koronavirus infeksiyasi tasdiqlangan bemor o‘tkir nafas, o‘pka-yurak va poliorgan yetishmovchiligidan;
- 29-aprel kuni Toshkentda 1959-yilda tug‘ilgan G. ismli bemor o‘tkir respirator distress sindrom, o‘tkir nafas yetishmovchiligi, o‘pka-yurak yetishmovchiligidan;
- 3-may kuni Namanganda M. ismli koronavirus infeksiyasini yuqtirib olgan bemor o‘tkir nafas va yurak qon-tomir yetishmovchiligidan;
- 15-may kuni Samarqandda koronavirusga chalingan O‘. ismli ikkinchi guruh nogironi o‘tkir nafas va yurak qon-tomir yetishmovchiligidan;
- 17-may kuni koronavirusga chalingani Surxondaryoda aniqlangan sirdaryolik haydovchi I. yurak qon-tomir va o‘tkir nafas yetishmovchiligidan;
- 18-may kuni koronavirusga chalingan samarqandlik bemor yurak qon-tomir va o‘tkir nafas yetishmovchiligidan Toshkentda vafot etdi.
Ma’lumot uchun, 26-may soat 17:00 holatiga ko‘ra, O‘zbekistonda koronavirus infeksiyasini yuqtirib olish bilan bog‘liq 3281 ta holat aniqlangan. 26-may soat 19:50 holatiga ko‘ra bemorlarning 2636 nafari sog‘ayib, reabilitatsiyaga kuzatilgan.
Izoh (0)