JSST koronavirusni davolashda ikkita preparat sinovini vaqtincha to‘xtatdi

Jahon sog‘liqni saqlash tashkilotining ekspertlar guruhi gidroksixloroxin va xloroxinni COVID-19 kasalligini davolashda qo‘llashni vaqtincha to‘xtatdi, bunga ushbu dorilar tufayli o‘lim holatining oshgani sabab bo‘lgan. JSST bosh direktori Tedros Adhan Gebreyesus Jenevada o‘tgan brifingda preparatlarning samaradorligi olingan ma’lumotlar asosida qayta tahlil qilinishini bildirgan.

Gebreyesus 22-mayda The Lancet nashri tomonidan gidroksixloroxin va xloroxinning COVID-19 kasalligini davolashda qo‘llash bo‘yicha sinovlarning natijalari qayd etilgan maqola chop etilgani va unda ushbu dorilarni qabul qilgan bemorlarda o‘lim holatlari ko‘proq kuzatilgani haqida yozilganini ta’kidlagan. Ushbu material e’lon qilinganidan keyin JSST 10 ta mamlakatdan ekspertlar jalb qilingan birdamlik guruhini tuzgan.

“Birdamlik guruhiga 10 ta mamlakatdan vakillar olingan va ular barcha ma’lumotlarni tahlil qilib, ularga global miqyosda tanqidiy baho berishi lozim. Ijrochi guruh gidroksixloroxinni Birdamlik testi doirasida ishlatilishi vaqtincha to‘xtatilgan. Dori bilan bog‘liq vaziyat ma’lumotlar xavfsizligini ta’minlovchi monitoring guruhi tomonidan o‘rganiladi”, – degan u.Qayta baholash ishlari Birdamlik guruhi testlari vaqtida to‘plangan ma’lumotlar tahlili asosida amalga oshiriladi, dorining foydali jihatlari hamda aks ta’sir darajasi aniqlandi. Preparatning qanchalik darajada xavfli yoki xavfsiz ekani yaqin haftalarda ma’lum bo‘ladi.

Mart oyida boshlangan JSSTning Birdamlik testlarida shu vaqtga qadar dunyoning 35 mamlakatidan 400 ga yaqin kasalxona ishtirok etgan. Testlarda COVID-19’ga qarshi qo‘llaniladigan to‘rtta asosiy terapiya dorisi, dorilar aralashmasi ko‘rib chiqiladi.