Kanadadagi zirhli avtomobillar ishlab chiqarishga ixtisoslashgan Inkas atelyesi yangilangan Infiniti QX80’ning o‘q o‘tmaydigan versiyasini taqdim etdi. Yo‘ltanlamas BR6 standarti bo‘yicha ballistik himoyaga ega hashamatli avtomobilga aylantirilgan, deb xabar beradi Motor.
Infiniti 7,62 kalibrli o‘qqa, shuningdek, ikkita DM51 qo‘l granatalari portlashiga bardosh bera olishi uchun Inkas mutaxassislari mashina salonini kapsulaga aylantirgan. Amalga oshirilgan ishlarni beshinchi eshikni ochish orqali ko‘rish mumkin: orqa eshik ortida xuddi seyfniki kabi yana bir eshik joylashgan.
Inkas atelyesi QX80’ning og‘irligi qanchaga tengligi haqida ma’lumot bermagan, biroq ta’kidlanishicha, eshik ilgaklari kuchaytirilgan, chidamkor tormozlar o‘rnatilgan, elektron qurilmalari, akkumulyator va dvigateli qo‘shimcha himoyalangan. Bundan tashqari, yo‘ltanlamasga maxsus shinalar “kiygizilgan”.
Yo‘ltanlamas saloni to‘rt kishiga mo‘ljallangan. Interyeri qora charm va yog‘ochdan ishlangan, old o‘rindiqlarning bosh qo‘yadigan qismiga monitorlar o‘rnatilgan. Shuningdek, ovoz-signalli qurilma, o‘t o‘chiruvchi tizim, hujum vaqtida atrofdagilarni o‘ziga jalb etishga mo‘ljallangan sirena mavjud.
Zirhli mashinaning narxi hozircha e’lon qilinmagan, biroq u odatdagi QX80’dan kamida ikki barobarga qimmat bo‘lishi aniq. AQShda QX80 taxminan 91,5 ming dollar turadi, shu sababli himoyalangan yo‘ltanlamas narxi 200 ming dollar atrofida bo‘lishi kutilmoqda.
Izoh (0)