Koronavirus pandemiyasi tufayli Green Card hamda AQSh fuqaroligi va immigratsiya xizmatining boshqa dasturlarida ishtirok etish uchun beriladigan arizalar soni keskin kamayib ketdi. Bu esa federal agentlikning to‘lov qobiliyatini xavf ostiga qo‘ymoqda, deb yozadi The New York Times.
O‘z faoliyati uchun arizachilardan olinadigan mablag‘lar evaziga moliyalashtiriladigan AQSh fuqaroligi va immigratsiya xizmati yoz oyiga borib pullari tugashi mumkinligini ma’lum qildi, chunki pandemiya sabab odamlarning viza va boshqa imtiyozlar bo‘yicha murojaati kamaygan.
“COVID-19 pandemiyasi sabab USCIS daromadlari keskin kamayib ketdi”, — deydi agentlik vakili. Uning ta’kidlashicha, 30-sentabr kuni tugaydigan moliyaviy yil oxiriga borib, daromad 60 foizga tushib ketishi mumkin.
Vakilning so‘zlariga ko‘ra, kongress 1,2 milliard dollar miqdorida pul ajratmasa, agentlik o‘z faoliyatini bir necha oy davomida moliyalashtira olmaydi.
Nashrning ta’kidlashicha, USCIS avvalroq ko‘tarilgan narxlardan tashqari yig‘imlar uchun yana 10 foizli “ustama” joriy etishni rejalashtirmoqda.
Mavzuga doir: AQSh hukumati Green Card qoidalarini qiyinlashtirmoqchi
Eslatib o‘tamiz, o‘zbekistonliklar 2018-yilda dunyo bo‘yicha Green Card o‘ynaganlarning 9 foizini tashkil etgan.
Izoh (0)