“Tottenhem” klubi hujumchisi Son Hyon Min Janubiy Koreyada harbiy xizmatni o‘tamoqda.
ESPN koreyalik futbolchining harbiy kiyimdagi suratini e’lon qildi. Unda Sonning yuzi niqob bilan to‘silgan va futbolchi avtomat ushlab olgan.
27 yoshli hujumchi Cheju orolidagi dengiz qo‘shinlari o‘quv-mashg‘ulot lagerida harbiy tayyorgarlikdan o‘tmoqda. Ta’kidlanishicha, Son tayyorgarlik vaqtida ko‘zdan yosh oqizuvchi gazdan foydalanish amaliyoti bilan tanishadi, uzoq masofaga yurishda qatnashadi va quroldan o‘q otishni o‘rganadi.
Eslatib o‘tamiz, Janubiy Koreya qonunlariga ko‘ra, erkaklar 28 yoshga qadar 21 oylik harbiy xizmatni o‘tashi kerak. 2018-yilda Son Janubiy Koreya terma jamoasi bilan Osiyo o‘yinlarida g‘oliblikni qo‘lga kiritgan va buning evaziga harbiy xizmatdan ozod etilgandi. Biroq futbolchi qisqartirilgan harbiy tayyorgalik jarayonidan o‘tishi kerak.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)