Sardoba suv omborining yorilishi natijasida toshqin oqibatlarini bartaraf etish ishlari olib borilmoqda. Favqulodda vaziyat sodir bo‘lgan hududda Favqulodda vaziyatlar, Mudofaa, Ichki ishlar vazirliklari, Milliy gvardiya va boshqa davlat xizmatlarining 2 mingga yaqin maxsus texnikasi ishlamoqda. Bu haqda FVV matbuot xizmati xabar qilgan.
Xabarga ko‘ra, yong‘in o‘chirish mashinalari va motopompa yordamida toshqin suvi uylardan, infratuzilma obyektlaridan chiqarilib, sug‘orish va drenaj tizimlari tozalanmoqda.
Shuningdek, qo‘shimcha ravishda elektr tarmoqlari, gaz, suv quvurlari va boshqa turdagi kommunal tarmoqlarni tiklash bo‘yicha keng ko‘lamli ishlar olib borilmoqda.
Toshqindan zararlangan 58 ta bazaviy mobil stansiyadan 48 tasi ta’mirlandi. Shu bilan birga, ishdan chiqqan boshqa infratuzilma obyektlariga yetkazilgan zarar miqdorini baholash ishlari ham olib borilmoqda.
Dastlabki hisob-kitoblarga ko‘ra, zarar yetgan infratuzilma obyektlariga 8 ta bolalar bog‘chasi, 16 ta maktab, 7 ta tibbiyot muassasasi, 1 ta kollej, 7 ta qabriston, 3 ta masjid, 13 ta respublika ahamiyatidagi ko‘prik, 52 kilometr uzunlikdagi yo‘l, 1 ta dehqon bozorini kiritish mumkin. Shuningdek, 99 ta ko‘p qavatli turar-joy binosiga qisman zarar yetgan.
FVV Sirdaryo viloyatining suv toshqini bo‘lgan hududlariga joylardan insonparvarlik yordamlari kelishi davom etayotganini ham ma’lum qilgan. Sirdaryo viloyatiga 180 tonna un, 48 tonna makaron mahsulotlari, 63 tonna o‘simlik yog‘i, 47 tonna guruch, 37 tonna go‘sht, 58 tonna shakar, 228 tonna kartoshka, 176 tonna piyoz va boshqa mahsulotlar yetkazib berildi, deyiladi xabarda.
Ma’lumot uchun, Sirdaryo viloyatidagi Sardoba suv omborida sodir bo‘lgan favqulodda vaziyat tufayli Sardoba, Oqoltin, Mirzaobod tumanlaridagi 24 ta mahalladan 90 mingga yaqin fuqaro zudlik bilan xavfsiz hududga evakuatsiya qilingan; hodisa oqibatida kamida 56 kishi turli darajada tan jarohati olgan, toshqin zonasida qolib ketgan yuzlab odamlar qutqarilgan, shuningdek, 4 nafar fuqaroning tabiiy ofat oqibatida halok bo‘lgani, 1 nafari bedarak yo‘qolgani aniqlandi.
Voqea yuz bergan kuniyoq Prezident Shavkat Mirziyoyev Sirdaryo viloyatiga yetib bordi. U suv toshqini oqibatlarini ko‘zdan kechirdi, ofatdan jabrlangan aholi bilan muloqotda bo‘ldi, sharoit yaxshilanmagunicha hech bir rahbar hech qayerga ketmasligini ta’kidladi. Allaqachon qayta tiklanishi boshlangan to‘g‘onni bir necha bor borib ko‘rdi, ish jarayoni bilan tanishdi. To‘g‘onning yorilishi yuzasidan jinoyat ishi qo‘zg‘atilgan.
Izoh (0)