“Oskar” mukofoti sohibi Tayka Vaytiti “Yulduzlar jangi” franshizasi bo‘yicha yangi to‘liq metrajli filmning rejissori va ssenariy mualliflaridan biriga aylanadi. Bu haqda Lucasfilm’ga tayanib, Meduza xabar berdi.
Vaytiti ssenariyni “1917” va “O‘tgan tunda Soxoda” filmlari ustida ishlagan Kristi Uilson-Kerns bilan birga yozadi.
Xabarda yangi zelandiyalik Vaytiti aynan qanday film suratga olishi va kinolentaning premyerasi qachon bo‘lishiga oydinlik kiritilmagan. Ammo Disney 2022, 2024 va 2026-yillarda “Yulduzlar jangi” bo‘yicha yangi filmlarni taqdim etishi rejalashtirilgan.
Tayka Vaytiti “Tor: Ragnaryok” va “Quyoncha Jojo” filmlari rejissori hisoblanadi. Vaytiti ilgari “Yulduzlar jangi”da ishlagan. U “Mandaloriyalik” serialining birinchi mavsumi yakuniy epizodini suratga olgan va teleshouda IG-11 droidiga ovoz bergan.
Vaytiti o‘zining so‘nggi filmi — “Quyoncha Jojo” uchun “Eng yaxshi moslashtirilgan ssenariy” nominatsiyasida “Oskar” va BAFTA mukofotlarini qo‘lga kiritgan.