Jahon banki koronavirus oqibatlarini bartaraf etish uchun O‘zbekistonga 200 million dollar ajratishni ma’qulladi. Bu haqda O‘zbekiston Bosh vaziri o‘rinbosari – Iqtisodiy taraqqiyot va kambag‘allikni qisqartirish vaziri Jamshid Qo‘chqorov o‘zining Twitter’dagi sahifasida ma’lum qildi.
“Muhtaram Prezidentimiz tomonidan olib borilayotgan samarali iqtisodiy-ijtimoiy siyosatni e’tirof etish va qo‘llab-quvvatlash sifatida bugun Jahon bankining direktorlar kengashi O‘zbekistonga 200 million dollar ajratishni ma’qulladi.
Ushbu mablag‘lar sog‘liqni saqlash va ijtimoiy himoya tizimini mustahkamlashga, shuningdek, iqtisodiyot tarmoqlarini qo‘llab-quvvatlashga yo‘naltiriladi”, — deb yozgan Qo‘chqorov o‘zining mikroblogida. Jahon banki tomonidan e’lon qilingan xabarda yozilishicha, bu qo‘shimcha moliyalashtirish O‘zbekistonda koronavirus oqibatlarini yumshatish uchun ajratiladi.
“Jahon banki tomonidan ajratilayotgan qo‘shimcha moliyalashtirish pandemiya tarqalishining oldini olish, uning insonlar va milliy iqtisodiyot uchun oqibatlarini yumshatishga yo‘naltirilgan O‘zbekistonning inqirozga qarshi kurashish dasturini qo‘llab-quvvatlaydi”, — deb ta’kidlagan Jahon bankining o‘zbekistondagi vakolatxonasi rahbari Hideki Mori.
Yuqorida keltirib o‘tilgan 200 million dollar 24-aprelida Jahon banki tomonidan ma’qullangan 95 million dollar miqdoridagi mablag‘ga qo‘shimcha sifatida ajratiladi. Ushbu mablag‘lar O‘zbekistonda sog‘liqni saqlash milliy tizimi faoliyatini takomillashtirish va koronavirus pandemiyasining oqibatlarini bartaraf etish bo‘yicha hukumatning tezkor choralari doirasida ijtimoiy himoyani kuchaytirishga mo‘ljallangan.
Eslatib o‘tamiz, Moliya vazirligi O‘zbekiston hukumati tomonidan 2019-yilda jalb qilingan qarz miqdorini ma’lum qilgan edi. O‘zbekiston Prezidentining 22-aprelda imzolagan qaroriga ko‘ra, pandemiya oqibatlarini kamaytirish uchun 2020-yilda 3,1 milliard dollar jalb qilish rejalashtirilmoqda.
Avvalroq Xalqaro valyuta jamg‘armasi koronavirusga qarshi kurashda O‘zbekistonga ajratadigan krediti uchun qo‘shimcha shart qo‘ymasligini ma’lum qilgandi.
Izoh (0)