Bahor-yoz, hatto kuz oyining boshlarida ham kunlar issiq bo‘lgani sabab ayollar zamonaviy bo‘lish bilan birga havo o‘tkazadigan libos kiyishni istaydi. Shifon matoli ko‘ylak esa aynan ushbu mavsum uchun juda mos. Trendy U nashri shifon liboslar bilan yaratilgan turli obrazlarni taqdim qiladi.

Shifon Xitoyda paydo bo‘lgan, u vaqtda ushbu matodan tikilgan libosni kiyishga hammaning ham moliyaviy ahvoli to‘g‘ri kelmagan, faqat o‘ziga to‘q xonadon vakillarigina kiya olgan. Bugunga kelib esa istalgan rangdagi uzun yoki kalta shifon ko‘ylaklarni xohishga qarab tanlash mumkin.

Shifonni nimalar bilan moslash mumkin?

Bahorning ayni kunlarida, ya’ni iliq havoda shifon ko‘ylak ustidan jinsi yoki charm pidjak kiyish mumkin. Kundalik obraz uchun krossovka, keta yoki baletka; kechki obraz uchun esa bosonojka, uchli tufli yaxshi variant. Ofis uchun oq-qora printli shifon ko‘ylak, ustidan klassik uslubdagi pidjak yoki kostyum kiyish tavsiya qilinadi.

Salqin kunlarda kurtka, botford bilan chiroyli obraz yaratish mumkin. Bo‘yin qismi yopiq bichimdagi shifon ko‘ylak bilan sochni yig‘ib turmaklash va katta, noodatiy zirak taqish; old qismi ochiq libos bilan esa bo‘​yinga ro‘​moldan aksessuar sifatida foydalanish mumkin.