Kecha, 29-aprel kuni, soat 19:30 dan 21:00 gacha davom etgan kuchli shamol oqibatida Farg‘ona viloyatining ko‘plab hududlarida yuqori kuchlanishli elektr tarmoqlarida avariyali uzilishlar kuzatildi, deya xabar beradi “Daryo” muxbiri.
Ta’kidlanishicha, yuqori kuchlanishli elektr tarmoqlaridagi podstantsiyalarda avariyaga qarshi avtomatik tizim ishga tushishi natijasida elektr ta’minotining favqulodda o‘chish holati yuz bergan.
“Farg‘ona hududiy elektr tarmoqlari korxonasi” AJ axborot xizmatining “Daryo”ga ma’lum qilishicha, viloyatning Beshariq, Furqat, Buvayda, Uchko‘prik tumanlarida hamda Marg‘ilon, Quvasoy, Qo‘qon shaharlarining ayrim hududlarida noqulay ob-havo sharoiti sabab 6—10 kVli elektr uzatish havo tarmoqlarida avariyali uzilishlar vujudga kelgan.
“Daryo” muxbirining qo‘shimcha qilishicha, Qo‘shtepa, Oltiariq, Rishton, Bag‘dod, Buvayda, Uchko‘prik, Furqat va Beshariq tumanlarida kecha 12 soat davomida elektr toki bo‘lmagan.
Biroq mas’ul tashkilot tasarrufidagi barcha podstantsiyalar hamda havo liniyalariga xizmat ko‘rsatuvchi texnik-muhandislar kuchaytirilgan tartibda xizmat qilayotganini ta’kidlangan. Navbatchilar safiga qo‘shimcha brigadalar jalb etilgan.
Eslatib o‘tamiz, Buxoro viloyati kuchli shamoldan so‘ng elektr ta’minotida eng katta talafot ko‘rgan hudud bo‘ldi. Buxoroda 27-aprel shamolidan so‘ng Qorako‘l va Olot tumanlari bilan aloqa uzilib qoldi. Aynan elektr simlarining uzilib tushishi bir kishining umriga zomin bo‘ldi.
Izoh (0)