O‘zbekiston Davlat soliq qo‘mitasi xodimlarining karantin davrida 30 kun davomida avtomobil boshqarish huquqini beruvchi stiker uchun tadbirkorlardan soliqlarni oldindan yarim yil muddatga to‘lashni talab qilayotgani haqidagi xabarlarni inkor etdi.
Qo‘mita axborot xizmatining yozishicha o‘rta va kichik biznes vakillarining avtotransportlarga ruxsatnomalar olish masalalariga hokimiyatlar (viloyat, shahar va tuman hokimliklari) javob beradi. Hisobot davrining boshlanishi tufayli, shuningdek, hokimiyatlarda ruxsatnomalar berish o‘z vaqtida amalga oshirilishi kechikkani hamda soliq majburiyatlarini bajarishni ta’minlash maqsadida DSQ Respublika maxsus komissiyasi topshirig‘iga asosan respublikadagi katta soliq to‘lovchilarga (ularning soni 779 ta) maxsus ruxsatnoma berishni boshlagan.
DSQ stikerlarni my.soliq.uz portalidagi shaxsiy kabinetda elektron so‘rov orqali olish mumkinligini eslatgan.
Shuningdek, qo‘mita soliq to‘lovchilardan oldindan to‘lov qilish talabi qo‘yilmayotganini ham qayd etgan. Xabarda soliq organlari tomonidan stiker uchun oldindan olti oylik soliqlarni to‘lash talab qilinganda (71)−244 98 27 yoki (71)−244 98 34 raqamlariga qo‘ng‘iroq qilish so‘ralgan, ushbu holat tasdig‘ini topsa, xodimga nisbatan tegishli chora ko‘rilishi aytilgan.
Avval Davlat soliq qo‘mitasi yirik soliq to‘lovchilarga stiker berilishini ma’lum qilgani, keyinchalik stiker olishi mumkin bo‘lgan yirik soliq to‘lovchilar toifasiga kimlar kirishi haqida ma’lumot bergani xabar qilingandi.
Izoh (0)