O‘zbekiston Prezidenti Shavkat Mirziyoyev raisligida 24-aprel, juma kuni, aholi bandligini ta’minlash va iqtisodiyot tarmoqlari faoliyatlarini tiklash masalalari muhokamasiga bag‘ishlangan navbatdagi videoselektor yig‘ilishi o‘tkazildi. Bu haqda Prezident matbuot xizmati xabar berdi.
Videoselektor yig‘ilishida Farg‘ona va Qashqadaryo viloyatlarida iqtisodiyot tarmoqlarini barqaror ishlatish, aholi bandligini ta’minlash, ehtiyojmand oilalarni ijtimoiy qo‘llab-quvvatlash masalalari muhokama qilindi.
Mavzuga doir: Farg‘ona va Qashqadaryodagi koronavirus xavfi past bo‘lgan hududlarda karantin choralari bosqichma-bosqich yumshatiladi
Prezident aholi bandligini ta’minlash uchun qurilishlarni davom ettirishga ruxsat berilganini inobatga olib, mazkur ikki viloyatdagi obyektlarda belgilangan ishlarni jadallashtirish zarurligini ta’kidladi.
Aholini oziq-ovqat mahsulotlari bilan uzluksiz ta’minlash va ichki bozorda narxlar barqarorligini saqlash — eng dolzarb masala. Bu boradagi katta rezervlardan biri esa bog‘ va tokzorlar qator oralaridir, deyiladi xabarda.
Farg‘ona viloyatida 34 ming gektar, Qashqadaryoda 22 ming gektardan ortiq maydonlarda bog‘ va tokzorlar bor. Lekin har yili faqat 20 foiz qator oralariga ekin ekiladi.
Shundan kelib chiqib, ushbu viloyatlar hokimlariga mavjud bog‘ va tokzorlar qator oralariga to‘liq ekin ekilishini tashkil qilish, shu orqali aholi bandligini ta’minlash vazifasi qo‘yildi.
Foydalanishdan chiqqan va lalmi yerlarda quduq qazib, aholiga bo‘lib berish zarurligi qayd etildi. Buning uchun Farg‘onaga 15 milliard so‘m, Qashqadaryoga 11 milliard so‘m ajratilgan.
Kam ta’minlangan oilalarga qoramol, parranda va asalari uyasi tarqatib, kooperatsiya asosida aholi bandligini ta’minlash, mahsulot yetishtirishni ko‘paytirish bo‘yicha topshiriqlar berildi.
Bu yil suv kamligi sababli O‘zbekiston, Uchko‘prik, Yozyovon, Qo‘shtepa, Mirishkor, Nishon, Muborak va Kasbi tumanlarida takroriy ekinlarni sug‘orishda qiyinchiliklar bo‘lishi mumkin. Shu bois ushbu hududlarda suv kam talab qiladigan, eksportbop dukkakli ekinlar ekish maqsadga muvofiqligi ta’kidlandi.
G‘alladan bo‘shagan maydonlarning 50-60 foiziga fermer o‘z ishchilari bilan ekin ekishi, qolgan qismini karantin sharoitida vaqtincha ishsiz qolgan va ko‘makka muhtoj aholiga bo‘lib berishni tashkil etish vazifasi yuklatildi.
Farg‘ona va Qashqadaryo viloyatlari hokimlari karantin qoidalariga amal qilgan holda korxonalarni ishga tushirish, aholi bandligini ta’minlash masalalari yuzasidan hisobot berdi.
Eslatib o‘tamiz, Shavkat Mirziyoyev raisligida 8-aprel kuni o‘tkazilgan yig‘ilishda pandemiya sharoitida oziq-ovqat yetishmovchiligining oldini olish uchun tomorqadan samarali foydalanish bo‘yicha topshiriq berilgan hamda tomorqadan samarali foydalanmayotgan xonadon egalariga nisbatan chora ko‘rish bo‘yicha hujjat ishlab chiqish vazifasi qo‘yilgandi. Shundan so‘ng Oliy Majlis Qonunchilik palatasi O‘zbekistonda tomorqa yerlardan unumli foydalanmagan fuqarolarni jarimaga tortishni nazarda tutuvchi qonun loyihasini qabul qildi. Shuningdek, 8-aprel kuni o‘tkazilgan yig‘ilishda ishsiz aholini qishloq xo‘jaligiga jalb qilish bo‘yicha ham bir qator imkoniyatlar yaratilgani ma’lum qilingandi.
Izoh (0)