Dastlabki ma’lumotlarga ko‘ra, 2020-yil yanvar—mart oylarida O‘zbekiston yalpi ichki mahsuloti (YaIM) hajmi joriy narxlarda 110,5 trillion so‘mni tashkil etdi. Bu haqda Davlat statistika qo‘mitasining ma’lumotlarida keltirilgan.
Ta’kidlanishicha, 2020-yil yanvar—mart oylarida YaIM o‘sishi 2019-yil shu davridagi 5,7 foiz va 2018-yilgi 5,6 foizga nisbatan 4,1 foizgacha sekinlashgan. Aholi jon boshiga hisoblangan YaIM hajmi 3,2 million so‘mni tashkil etdi va u ko‘rsatkich 2019-yilning yanvar—mart oylari bilan taqqoslaganda 2 foizga o‘sdi.
2019-yilning oxirida Markaziy bank 2020—2023-yillar bo‘yicha asosiy va xatarli (muqobil) ssenariyni taqdim etgandi. Ikkinchi ssenariyning asosini bir qator omillar tashkil etgan, masalan, asosiy savdo sheriklariga nisbatan sanksiyalarning kuchayishi va neft narxlarining pasayishi.
Bu holda O‘zbekiston mahsulotlariga bo‘lgan talab pasayib ketadi, eksportchilar zarar ko‘radi, mehnat muhojirlarining pul o‘tkazmalari hajmi qisqaradi. Bu esa so‘mning tezda qadrsizlanishiga olib keladi va aholi uchun narx darajasiga ta’sir qiladi.
“Tashqi potensial shoklarning barchasi birinchi navbatda, YaIM hajmiga ta’sir ko‘rsatadi. Agarda bu sodir bo‘lsa, O‘zbekiston iqtisodiyotining o‘sishi 2020-yilda 4,7 foizga sekilashadi”, — deya prognoz qilgan edi Markaziy bank.
Izoh (0)