“This website will self destruct” — shunday saytki, agar 24 soat mobaynida u orqali hech kim xat jo‘natmasa, o‘zini “yo‘q qiladi”, deb yozadi Meduza.
Istalgan kishi saytga kirishi va maxsus sahifada ishlari qanday ekanligi yoki shu damda uni nima tashvishlantirayotgani haqida yozishi mumkin. Xat jo‘natilganidan so‘ng u umumiy bazaga tushadi hamda uni boshqalar ham ko‘rishi mumkin bo‘ladi. Boshqa foydalanuvchilar xat mazmuni bilan tanisha oladi, uning kim tomonidan yozilgani esa sir tutiladi.
Saytda ikkita tugma bor, biri turli mamlakatlardagi ruhiy qo‘llab-quvvatlash markazlari telefon raqamlari, ikkinchisi esa tasodifiy xatlarni bazadan tanlab, ekranga olib chiqadi.
Sayt tashrif buyuruvchilari karantindan nolib xatlar yozmoqda. Kimdir ota-onasini, boshqa birov sevgilisini ko‘ra olmayotganidan shikoyat qilgan. Ayrimlar hazillar yozib, odamlarning kayfiyatini ko‘tarishga harakat qilmoqda, yana kimdir yoz uchun rejalari bilan o‘rtoqlashgan.
Yana bir foydalanuvchi xavotir hissini kamaytirish uchun ichkilikka ruju qo‘ygani, biroq vaziyat yanada yomonlashganini yozgan. U, albatta, o‘zini qo‘lga olishga so‘z bergan hamda xatini o‘qiganlarga minnatdorchilik bildirgan.
Loyiha mualliflariga ko‘ra, sayt yaratilganidan so‘nggi birinchi dam olish kunlari mobaynida saytga 15 mingdan ortiq kishi xat yozgan. Bu xatlarni umumiy hisobda million martadan ko‘proq o‘qishgan.
“Odamlar hozir uyga qamalib qoldi. Fikrimcha, hozir ayrim insonlar his-tuyg‘ularini uyalmay izhor etishi uchun ularga qo‘llab-quvvatlov zarur. Shuning uchun ham men bu saytni yaratishga qaror qildim”, — deb yozadi sayt yaratuvchisi.
Izoh (0)