Havaskor va prof boksdagi farq, ilk gonorar, noxolis hakamlik hamda Olimpiada orzusi haqida Isroil Madrimov bilan intervyu

Isroil Madrimov — o‘zbek boksining oltin avlodi vakili. U 1995-yil 16-fevralda Xorazmda tug‘ilgan.

Havaskor boksda 2014-yil Janubiy Koreyada o‘tkazilgan yozgi Osiyo o‘yinlarida kumush medal, 2018-yilgi Indoneziyadagi Osiyo o‘yinlarida oltin medalga ega chiqqan. Uzbek Tigers jamoasi safida WSB musobaqasida 5 ta jang o‘tkazib, ularning barchasida g‘alaba qozongan. 2018-yil 24-noyabrida professional boksdagi faoliyatini boshlagan. U birinchi jangida meksikalik Vladimir Ernandesni 6-raundda nokautga uchratgan. Shundan so‘ng Isroil yana 4 ta jang o‘tkazdi va ularning barchasida nokaut evaziga g‘alabaga erishdi. Bu orada sportchi WBA Intercontinental kamari sohibiga aylandi. Dunyoga mashhur promouter Eddi Hirn yaqin 10 yillikning eng yaxshi bokschisi bo‘lishga asosiy da’vogar sifatida Madrimovni qayd etib kelmoqda.

“Daryo” muxbiri esa karantin vaqtida o‘zbekistonlik bokschi bilan suhbat qurishga muyassar bo‘ldi.

— Boksga kirib kelishi, bolalik yillari va undagi orzulari haqida

— Beshinchi sinfda o‘qiyotgan vaqtimda sport maktabiga qabul qilinganman. Boksdagi ilk saboqlarimni o‘sha yerda olganman. Dastavval menda sportchi bo‘lish istagi unchalik kuchli bo‘lmagan. Keyinchalik yutuqlar ketidan yutuqlar bo‘lavergach, yanada katta marralarni zabt etishni niyat qila boshlaganman. Osiyo o‘yinlarida Elshodbek Rasulov va boshqa bokschilarning g‘alabalarini ko‘rib, ularga havas qilib jahon arenalarida vatanimiz sharafini munosib himoya qilishni niyat qilganman.

— O‘ziga xos jang uslubingiz ayniqsa, sakrab beriladigan zarbalari raqiblarini dovdiratib qo‘yishi va bu mahoratga qanday erishgani haqida

— Albatta, har bir sportchining o‘ziga xos uslubi bo‘lgani kabi menda ham ko‘proq sakrab zarba berish va kutilmaganda hujum qilish uslubi yaxshi rivojlangan. Shuni hisobga olib, ko‘proq shunday harakatlarni bajarishga va uzoq masofalardan zarba berishga intilaman. O‘ylashimcha, bu muxlislarga ham yoqadi. Tabiiyki, bunday uslublarga ko‘p yillik mashg‘ulotlar va tinimsiz mehnat orqali yetiladi.

— O‘zbekistonlik bokschilarning so‘nggi yillardagi gegemonligi hamda yangi avlod haqida

— Bugungi kunda boks bo‘yicha O‘zbekiston terma jamoasi dunyoda yetakchilardan sanaladi va biz bu natijani tushirmaslikka harakat qilishimiz kerak. Hozirda yosh avlod yetishib kelmoqda, biz ularga ko‘proq e’tibor qaratishimiz, motivatsiya berib turishimiz va mashg‘ulot jarayonlarida o‘z tajribalarimiz bilan o‘rtoqlashishimiz lozim. Umid qilamanki, ular o‘zidan katta akalariga munosib o‘rinbosar bo‘la oladi.

— Professional va havaskor boksning farqi, o‘ziga qaysi biri qulayligi haqida

— Hozirgacha ikkalasida imkoniyatimni sinab ko‘rish baxtiga muyassar bo‘ldim. Ularning farqi haqida gapiradigan bo‘lsam, professional boks 12 raund davom etadi. Siz unga o‘zingizni jismonan va ruhan tayyorlay olishingiz kerak. Havaskorda esa 3 raundda barchasi tez hal bo‘ladi. Hozirda menga ko‘proq professional boks yoqyapti va unga moslashishim tezroq kechmoqda. Shu paytgacha beshta jang o‘tkazib barchasida g‘alaba qozondim. Albatta, havaskor boksni ham unutib qo‘yganim yo‘q, mashg‘ulotlarni olib boryapmiz.

— Havaskor boksdagi hakamlik, o‘ziga bo‘lgan noxolis munosabatlar haqida

— To‘g‘ri, havaskor boksda hakamlarning xatoliklari uchrab turadi va asosan menda ko‘proq takrorlanib, shijoatimning so‘nishiga sabab bo‘lgan. Professionalga o‘tishimning asosiy sabablaridan biri ham shu. Ochig‘i, bu muammoni hal qilishning iloji bormi, yo‘qmi degan savolga javob berish qiyin. Chunki bu holat oldin ham bo‘lgan va, menimcha, bundan keyin ham bo‘ladi (kulib). Bu holatning oldini olish uchun bahsni birinchi raunddayoq tugatish kerak deb, o‘ylayman. Bu esa juda qiyin.

— Professional boksdagi ilk gonorari 

— Ilk g‘alabamdan keyingi gonorarim 50 ming AQSh dollari bo‘lgan.

— AQSh va O‘zbekistondagi hayot tarzi haqida

— Amerika haqida gapiradigan bo‘lsam, judayam rivojlangan davlat va yashash uchun barcha qulayliklar yaratilgan. Har qanday yumushingizni uydan chiqmasdan turib hal etishingiz mumkin. Mahalliy aholi ham bir-biriga hurmat bilan muomala qiladi. Qo‘shningiz yoki biror boshqa insonda qandaydir xusumatingiz bo‘lsa ham unga yaxshi munosabatda bo‘lishingiz kerak. Mana shu tomonlari meni hayron qoldirdi. Biroq G‘arb davlatlarida bo‘lgani kabi, u yerda ham farzand balog‘at yoshiga yetgach, ota-onasidan alohida yashaydi. Bu esa bizning mentalitetimizga yod bo‘lgan tushuncha.

— Sportning aksariyat turlarida boshqaruv bevosita sportga aloqador bo‘lmagan shaxslar qo‘lida ekanligiga munosabati

— Bu sportning rivojlanishiga katta to‘sqinlik qiladi. Agar rahbariyat sportni tushunadigan va qo‘llab-quvvatlaydigan bo‘lsa, albatta, o‘sha sportda o‘sish ham katta bo‘ladi, yutuqlar ham shunga yarasha bo‘ladi.

— Professional sportchilarda har doim ham darslarga qatnashish imkoniyati bo‘lavermasligi haqida

— Professional sportchilar birinchi navbatda mashg‘ulot va musobaqalarga e’tibor qaratadi. Lekin yoshlikda yaxshi bilim olinsa va muntazam ravishda takrorlab turilsa bu hech qachon ziyon qilmaydi. Qolaversa, har bir sportchi ko‘proq kitob mutolaa qilishi kerak. Bu – bevosita ularning ong darajasiga ta’sir ko‘rsatishdan tashqari, faoliyatida ham asqatadi.

— Sport maktablariga kirish imtihonlaridagi nohaqliklar to‘g‘risida har xil gap-so‘zlar yurishi va bunga munosabati haqida

— Yuqorida ta’kidlab o‘tganimdek, agar sportda uni tushunmaydiganlar bo‘lsa, o‘sha sohada o‘sish bo‘lmaydi. Lekin sport maktabidagi murabbiylar yetarlicha tajribaga ega. Ular kelajakda yaxshi natija ko‘rsatishi mumkin bo‘lgan bolalarni saralab oladi va iloji boricha nohaqliklarga yo‘l qo‘ymaydi.

— Iordaniyadagi Tokio Olimpiadasiga yo‘llanma beradigan musobaqada ishtirok etmaganligining sababi haqida

— Iordaniyadagi musobaqada qatnashmaganim sababi mart oyining boshida professional boksda navbatdagi jangimni o‘tkazishim kerak edi va bu oldindan rejalashtirilib qo‘yilgandi. Shuning uchun unda qatnasha olmadim.

— Rio–2016 Olimpiadasiga bora olmagani haqida

— Riodan qolib ketishimga o‘zim sababchiman, chunki Osiyo chempionatida imkoniyatni boy berib qo‘ygandim. Bundan tashqari, undan keyingi O‘zbekiston chempionatida ham muvaffaqiyatsiz tarzda ishtirok etgandim. Mening o‘rnimga chempionlikni qo‘lga kiritgan Shaxram G‘iyosov Rioga boradigan bo‘ldi. Bu, albatta, to‘g‘ri qaror bo‘lgan. Muvaffaqiyatsizligimga sabab vaznimning oshib ketishi bo‘lgan. Shundan so‘ng, o‘zimni 75 kilogramm vazn toifasida sinab ko‘rishga qaror qildim. Shukurki, katta yutuqlarga erishyapman.

— Hobbilari va sevimli mashg‘ulotlari haqida

— Zavqli mashg‘ulotlarim juda ko‘p. Ko‘proq futbol, tennis o‘ynab turaman. Do‘stlarim bilan suhbatlashaman. Oilam bilan kam birga bo‘laman shu bois, bo‘sh vaqtim bo‘ldi deguncha, ota-onam va yaqinlarim bilan bir davrada o‘tirishga intilaman.

— Hozir qayerdaligi, karantin va mashg‘ulotlar haqida

— Hozir Xorazmdagi uyimdaman. Barchamizga ma’lumki, hozirda yurtimizda karantin joriy etilgan, uydan chiqmagan holda mashg‘ulot olib boryapman. Uyda mashg‘ulotlar uchun kerakli bo‘lgan barcha anjomlar bor. Men uyda bajarish mumkin bo‘lgan jismoniy mashqlarni bajaryapman.

— Kelajakdagi rejalari haqida

— Kelajakdagi rejalarim, nasib etsa professional boksda chempionlik kamarlarini qo‘lga kiritish va kelasi yili bo‘lib o‘tadigan Olimpiya o‘yinlarida qatnashib, O‘zbekiston hisobiga oltin medalni qo‘shib qo‘yish.