Andijonda qo‘shnilari va profilaktika inspektorini haqorat qilgan va Namangan viloyati bilan chegarada tashkil qilingan nazorat punktida jamoat tartibini buzgan fuqarolar 15 sutkaga qamaldi. Bu haqda “Daryo”ga Andijon viloyati Ma’muriy sudi raisi Otabek Mirzamahmudov xabar bermoqda.
Ma’lum bo‘lishicha, 2020-yilning 9-aprel kuni taxminan soat 21:00 da Toshkent shahrida yashovchi 37 yoshli fuqaro U.N. Baliqchi tumanidan Namangan viloyatiga o‘tish chegarasidagi nazorat punktida IIB xodimlari talabiga qarshi chiqqan. Haydovchi A.S. boshqaruvidagi Lada rusumli avtomashinada niqobsiz, mast holda postdan o‘tmoqchi bo‘lgan U.N. haydovchidan hujjat so‘ragan YPX xodimlarini tilga olib bo‘lmas so‘zlar bilan haqoratlagan.
Izboskan tuman Ma’muriy sudi huquqbuzar U.N. ishini ko‘rib chiqib, fuqaroni Ma’muriy javobgarlik to‘g‘risidagi kodeksning 54-moddasi 1-qismi (Epidemiyalarga qarshi kurash qoidalarini buzish) va 183-moddasi (Mayda bezorilik)da nazarda tutilgan huquqbuzarlikni sodir etganlikda ayblab, 1 million 115 ming so‘m miqdorida jarima hamda 15 sutka ma’muriy qamoq bilan jazoladi.
Shuningdek, 10-aprel kuni soat 19:30 larda Andijon shahar “Hamkorlik” mahallasida yashovchi B.S. ham mahalla idorasi ro‘parasida mast holda uyatsiz so‘zlar aytib, jamoat tartibi va fuqarolar osoyishtaligini buzgan. Bundan tashqari profilaktika inspektori S.Hurqo‘ziyevning qonuniy talablariga qarshilik ko‘rsatib, uni nafsoniyatga tegadigan so‘zlar bilan haqoratlagan.
Andijon shahar Ma’muriy sudi huquqbuzar B.S.ni Ma’muriy javobgarlik to‘g‘risidagi kodeksning 54-modda 2-qismi (Epidemiyalarga qarshi kurash qoidalarini buzish), 194-modda 1-qismi (Ichki ishlar organlari xodimining qonuniy talablarini bajarmaslik) bilan aybli deb topib, 1 million 338 ming so‘m jarima hamda 15 sutka ma’muriy qamoq bilan jazolashni lozim topgan.
Izoh (0)