O‘zbekiston futbol assotsiatsiyasi birinchi vitse-prezidenti Ravshan Ermatov O‘zbekiston terma jamoasi bosh murabbiyligi va terma jamoaning o‘rtoqlik o‘yinlari masalasiga to‘xtaldi.
— O‘zbekiston terma jamoasiga Yevropadan kuchli mutaxassis olib kelish masalasiga fikringiz qanday?
— Yevropalik murabbiy masalasida ayni vaqtda gapirish noo‘rin. Chunki terma jamoada murabbiy bor. Agar umumiy bu mavzudagi fikrimni aytsam, murabbiyning qayerdan ekanligi muhim emas. Balki, asosiysi terma jamoaning o‘yin uslubiga qanchalik mosligini o‘rganish kerak. Murabbiyning ishga yondoshuvi va oldiga qo‘yadigan maqsadlari ahamiyatliroq.
— Nega O‘zbekiston terma jamoasi bosh murabbiyi bir vaqtning o‘zida ikkita jamoada ishlaydi?
— “Bunyodkor” klubi o‘zbek futbolida bugungi kunda juda katta o‘rin tutadi. Bilasiz, turli yoshdagi terma jamoalarimizga “Bunyodkor” akademiyasi ko‘plab iste’dodli futbolchilarni tarbiyalab berdi. Vadim Abramov assotsiatsiya bilan shartnoma tuzayotgan paytda bu masalani ko‘targandik. Murabbiy qiyin vaziyatda klubni tashlab ketmasligi, terma jamoadagi ishini prioritet masala deb bilishini ma’lum qildi.
— Terma jamoamiz qachon kuchliroq raqiblar bilan Toshkentda o‘ynaydi?— O‘zbekiston milliy terma jamoasi hozirda Jahon chempionati saralash musobaqasida qatnashmoqda. Tayyorgarlik esa bosh murabbiyning rejasidan kelib chiqib olib boriladi. Terma jamoa bosh murabbiyi Vadim Abramov rasmiy o‘yindagi bo‘lajak raqibdan kelib chiqib, biz uchun foydali bo‘lishi kutilayotgan raqibni tanlaydi va bizga murojaat qiladi. O‘z navbatida O‘FA rahbariyati va xalqaro aloqalar bo‘limi uning tanlagan jamoasi bilan muzokaralar o‘tkazamiz.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)