Bu haqda AOKA huzurida tashkil etilgan shtabdagi brifingda Sog‘liqni saqlash vazirligi huzuridagi Koronavirusga qarshi kurash shtabi a’zosi Habibulla Oqilov ma’lum qildi. Bu haqda “Daryo” muxbiri xabar bermoqda.
Ayni paytgacha O‘zbekistonda 100 mingdan ortiq inson koronavirus bo‘yicha testdan o‘tkazilgani, yaqin vaqt ichida ushbu raqamlar yarim millionga yetkazilishi rejalashtirilgani aytildi. Shuningdek, virusning yengil yoki og‘ir kechishi qon guruhi va rezus-faktorga bog‘liq emasligi ta’kidlandi.
Shuningdek, xalqaro yo‘nalishdagi xorijdan qaytgan haydovchilar uchun koronavirusga tahlil topshirishni tashkillashtirish xususidagi savolga shtab a’zosi quyidagicha javob bergan: “Koronavirusga tahlilni kasallik alomatlari bo‘lganda topshirish zarur. Alomatlar bo‘lmaganda shart emas. Hozirgi vaqtda maxsus komissiya tomonidan tahlil o‘tkazish huquqini xususiy klinikalarga ham berish masalasi o‘rganilmoqda. Shundan so‘ng istagan kishi tahlil topshirishi mumkin”.Habibullo Oqilov koronavirus diagnozi bilan davolanish, ayniqsa reanimatsion holatlarda arzon bo‘lmasligi, asosiysi shundaki, O‘zbekistonda koronavirus bilan bog‘liq barcha xarajatlar davlat tomonidan qoplanishi, bemor uchun barcha karantin hududlarida karantinda saqlanuvchi fuqarolar uchun bepul ekanligini eslatib o‘tdi.
Ma’lumot uchun, 18-aprel kuni O‘zbekistonda koronavirus infeksiyasini yuqtirib olish bilan bog‘liq 85 ta yangi holat tasdiqlandi. Taqqoslash uchun, 13-aprel kuni 133 ta, 14-aprel kuni 167 ta, 15-aprel kuni 137 ta, 16-aprel kuni 47 ta, 17-aprel kuni esa 56 ta holat aniqlangan edi.
Xorijda 73 o‘zbekistonlikda koronavirus aniqlangan (eng ko‘pi — 42 nafari — Rossiyada), ularning to‘rt nafari vafot etgan.
Izoh (0)