Qirg‘izistonda koronavirus bilan kasallanish bo‘yicha yana 17 ta holat qayd etildi — ular orasida tibbiyot xodimlari yo‘q. Bu haqda Qirg‘iziston Sog‘liqni saqlash vazirligiga tayanib, “Kloop.kg” xabar berdi.
18-aprel holatiga ko‘ra, butun mamlakat bo‘ylab COVID-19 koronavirus infeksiyasi bilan kasallanganlar soni 506 kishiga yetgan. Ta’kidlanishicha, kasallikni yuqtirib olganlar orasida ancha vaqtda buyon birinchi marta birorta ham tibbiyot xodimi yo‘q.
Kasallanish bo‘yicha yangi holatlar Norin viloyatida — 11 kishi, O‘sh viloyatida — 5 kishi va O‘sh shahrida — 1 kishida aniqlangan.
Koronavirus aniqlangan barcha yangi bemorlar avvalroq kasallikka chalinlarning oila a’zolari va ular bilan aloqada bo‘lganlar. Ayni vaqtda COVID-19 holatlari mamlakatning quyidagi hududlarida qayd etildi:
- O‘sh viloyati — 140;
- O‘sh shahri — 74;
- Bishkek — 102;
- Chuy — 28;
- Jalolobod — 93;
- Norin — 56;
- Issiqko‘l — 8;
- Botkenda — 5 kishi.
O‘zbekistonda 18-aprel soat 10:00 holatiga ko‘ra, koronavirus infeksiyasini yuqtirib olganlar soni 1450 kishiga yetdi. Mamlakatda 15-martdan buyon koronavirusga chalingan bemorlarning to‘rt nafari vafot etdi, 156 nafari esa sog‘ayib, reabilitatsiyaga olindi. Xorijda kamida 23 o‘zbekistonlikda koronavirus aniqlangan, ularning to‘rt nafari vafot etgan.
Izoh (0)