Garderobingizning yangilash vaqti kelganini anglatuvchi 5 ta belgi

Shkaf to‘la kiyim, siz har kuni har xil kiyinasiz, lekin shunga qaramay o‘zingizni eskicha uslubda kiyingandek his qilasizmi? Unda kiyinish borasidagi ayrim jihatlarni o‘zgartirishingizga to‘g‘ri keladi. Cosmopolitan nashri qanday kiyimlar urfdan qolganiga to‘xtaldi.

Oldingi mavsumlarda trendda bo‘lgan liboslar garderobingizda bor va siz hali ham ularni dolzarb hisoblaysiz. Velosiped-shortiklar, platformali baland krossovkalar, charm kepkalar — agar rostan ham sizda shularning biri topilsa, yaxshisi ularni kiymang. Bu kabi libos va poyabzallar sizni didsiz ko‘rsatadi. Uning o‘rniga minimal uslubdagi rang va bichimli hech qachon urfdan qolmaydigan kiyimlar tanlang.

Oynaga qaraganda nimadandir ko‘nglingiz to‘lmayaptimi, demak, kiyinish uslubingizni o‘zgartirish vaqti keldi. Obraz tanlaganda qomatingiz ko‘zga tashlanib, beo‘xshov ko‘rsatadigan liboslardan voz keching. Kiyinish borasida uyg‘unlikka e’tibor bering.

Ochiq-sochiq kiyinishdan voz keching. Tushuning, 16-17 yosh emassiz endi. U vaqtda shunday liboslar qomatingizga yarashgan va sizni kiyim borasida tanlovdan qo‘rqmasliginingizni bildirgan bo‘lishi mumkin, lekin hozir emas. Ayniqsa, jamoat joylari va ishxonaga bunday uslubda kiyinmang. Ziyofat va tantanalardan boshqa jiddiy joylarda bunday kiyinish siz haqingizda yaxshi taassurot qoldirmaydi. Qolaversa, moda olamida mini yoki ochiq-sochiq liboslar qolib, oversize uslubidagi keng va erkin harakatlanish mumkin bo‘lgan, shu bilan birga nazokatli ko‘rsatadigan liboslar urfda ekaniga ancha bo‘ldi.

Jinsi eski uslubdami — obrazingiz muvaffaqiyatli bo‘lmasligi aniq. Jinsi trendi bel qismining qandayligi, uzunlik va kengligi, shuningdek, rangi bilan belgilanadi. Masalan, hozirgi vaqtda bel qismi yuqori bo‘lmagan shimlar urfda emas.

Bir libosni qayta-qayta kiyish, bitta sharf yoki ro‘molni doim bir xil obrazga qo‘shish, sochni faqat bitta uslubda turmaklashni bas qiling. Obrazingizga yangilik kiriting, imijingizni, hech bo‘lmaganda, aksessuarlaringizni o‘zgartiring. Bir xillikdan qoching, ko‘proq tajriba qilib, uslubingizni topishga harakat qiling.