Sarvar Karimov “Milliy TV”ni sudga berishini e’lon qilgach, “Sarvqomat dilbarim” filmi boshqa kanallarda o‘pishish sahnasi bilan birga efirga uzatildi

Bir necha hafta avval rejissor Sarvar Karimov “Milliy TV” u suratga olgan “Sarvqomat dilbarim” filmidagi bir necha sahnalar va titrlarni kesib tashlagani uchun telekanalni sudga bermoqchi ekanligini ma’lum qilgandi. Sarvar Karimov “Daryo” muxbiri Mirolim Isajonov bilan suhbatda karantin tufayli telekanalni sudga berish keyinroqqa qoldirilganini aytdi.

Navro‘z bayrami arafasida telekanal ijodkorlari filmdagi bir qancha kadrlarni kesib tashlagan holda uni tomoshabinlarga taqdim qilishdi. Birinchisi, film qahramonlari — Ilyos va Asalning Issiqko‘l bo‘yidagi bo‘sa sahnasi bo‘lsa, ikkinchisi, aynan shu sahnadagi kiyik obrazini ham olib tashlashgan. Kiyik ishtiroki juda muhim va uning zamirida katta ma’no bor edi. Bundan tashqari, Ilyosning “Ilhom” teatrida foye bo‘ylab yurish sahnasini ham olib tashlashgan. Eng alam qiladigani, film oxiridagi titrni to‘liq kesishgan, ya’ni mehnat qilgan ijodiy jamoa a’zolarining ism-familiyasi va boshqa ma’lumotlar ko‘rsatilmagan. Hech bo‘lmasa, o‘sha titrni tezlashtirib o‘tkazsa ham bo‘lardi.

Ijodkorning qilgan mehnatini qadrlash kerak. Efirga to‘g‘ri kelmaydigan sahnalari bo‘lsa, umuman namoyish etmasligi lozim edi. Hech kim ularning oldiga borib, kinoni efirga berishlarini so‘rab iltimos qilmagan.

Sarvar Karimov, rejissor

Sarvar Karimovning so‘zlariga ko‘ra, “Milliy TV” ijodkorlari film namoyishi oldidan ham, keyin ham rejissor bilan bog‘lanmagan. Karantindan so‘ng rejissor telekanalni sudga berish uchun advokat bilan ham gaplashib qo‘ygan.

U yerdagi ijodkorlarning ko‘pchiligi meni taniydi, telefon raqamimni bilishardi. Qo‘ng‘iroq orqali vaziyatni aytib, bir og‘iz ruxsat so‘rashsa, maslahatlashsa bo‘lardi. Filmni xohlagan joyidan o‘zidan o‘zi kesib tashlashmaydi-ku. “O‘zbekkino” milliy agentligi shu filmni ruxsat berib chiqarganidan keyin uni hech bir telekanal o‘zicha kesib tashlashga haqli emas. Kinoga faqat shu tashkilot javob berishi kerak.

Bu holat bo‘yicha Facebook’dagi sahifamga post joylaganimdan keyin ham “Milliy TV”ning biror vakili qo‘ng‘iroq qilib, bir og‘iz gap ham aytmadi. Haqiqatan men telekanalni sudga bermoqchi edim. Hatto advokat bilan ham gaplashgandim. Ammo karantin tufayli keyinroqqa qoldirildi.

“Sarvqomat dilbarim” “Milliy TV”da namoyish qilingach, “Sevimli” va “MY5” telekanallari ham mazkur filmimni efirga berishdi. Lekin ular hech qayerini kesishmay, to‘liqligicha tomoshabinlar e’tiboriga havola etdi.

Sarvar Karimov, rejissor

Ma’lumot uchun, “Sarvqomat dilbarim” filmi taniqli adib Chingiz Aytmatov tavalludining 90 yilligi munosabati bilan tasvirga olingan. O‘zbekistonlik va qirg‘izistonlik kinoijodkorlarni birlashtirgan mazkur kartina Tailand, Rossiya, Turkiya, Qirg‘iziston kabi mamlakatlar kinoteatrlarida namoyish etilgan hamda bir qator xalqaro festival va tanlovlarda qatnashgan.