“Ko‘rshapalaklarning koronavirusni chaqiradigan turi O‘zbekistonda uchramaydi” — Bahrom Almatov

Respublika davlat sanitariya-epidemiologiya osoyishtalik agentligi direktori Bahrom Almatov O‘zbekistonda koronavirusni keltirib chiqaruvchi ko‘rshapalaklar uchramasligini, biroq uy hayvonlari ham o‘rtadagi vosita bo‘lib qolishi mumkinligini ma’lum qildi.

“Koronavirus kasalligini keltirib chiqaruvchi tabiiy manba bu — ko‘rshapalaklar. Ko‘rshapalaklarning COVID-19’ni chaqiradigan turi O‘zbekiston hududida uchramaydi. Odamlarimiz ham ular bilan muloqotda bo‘lmaydi, lekin shu narsani yodda tutishimiz kerakki, uy hayvonlari ham o‘rtadagi vosita bo‘lib qolishi mumkin.

Qolaversa, uy hayvonlaridan juda ko‘p: exinokokkoz, iyersinioz, parazitar kasalliklar, gijja kasalliklari hamda yuqumli ichak kasalliklari yuqishi mumkin. Shu nuqtayi nazardan SSV tomonidan fuqarolarning mobil telefonlariga yuborilayotgan xabarlar shaxsiy gigiyena qoidalariga rioya etgan holda yashash tarzini joriy qilish bo‘yicha tavsiya hisoblanadi.

Shu o‘rinda bir narsani aytmoqchimanki, hozirgi karantin davrida oziq-ovqat mahsulotlarini sotish, tayyorlash bilan shug‘ullanadigan umumiy ovqatlanish shoxobchalari faoliyati vaqtincha to‘xtatilgan. U yerlardagi qoldiq ovqatlarni yeb, yashab yurgan daydi hayvonlar ham ko‘chaga chiqib ketdi. Shu sababli aholi punktlarida daydi it-mushuklarning ko‘payish holatlari uchramoqda. Aholi yashash punktlaridagi epidemiologik vaziyatning barqarorligini ta’minlash ko‘p jihatdan fuqarolarimizning o‘ziga bog‘liq. Agar shunday daydi, qarovsiz qolgan hayvonlarni ko‘rishsa, bu haqda tumanlarda joylashgan daydi itlarni tutish brigadalariga zudlik bilan murojaat qilishlarini so‘raymiz. Chunki daydi hayvonlar, ayniqsa, itlardan o‘ta xavfli yuqumli kasallik – quturish kasalligi yuqishi mumkin”, — deydi Almatov.