O‘zbekistonda karantin tadbirlari e’lon qilingan vaqtdan bugungi kunga qadar karantin qoidalariga amal qilmaslik bilan bog‘liq jami 59 921 ta holat aniqlandi, deb xabar bermoqda IIV matbuot xizmati.
Qayd etilishicha, eng ko‘p — 10 100 ta qoidabuzarlik Toshkent shahrida qayd etilgan. Toshkent viloyatida esa bunday holatlar soni 8 588 tani tashkil etmoqda. Respublika bo‘yicha aniqlangan qoidabuzarliklar esa quyidagicha:
- Farg‘ona viloyatida — 8 644 ta holat;
- Samarqand viloyatida — 5 712 ta holat;
- Sirdaryo viloyatida — 4 381 ta holat;
- Qashqadaryo viloyatida — 4 188 ta holat;
- Andijon viloyatida — 3 457 ta holat;
- Namangan viloyatida — 3 416 ta holat;
- Buxoro viloyatida — 2 412 ta holat;
- Qoraqalpog‘iston Respublikasida — 2 187 ta holat;
- Jizzax viloyatida — 2 115 ta holat;
- Surxondaryo viloyatida — 2 053 ta holat;
- Xorazm viloyatida — 1 997 ta holat;
- Navoiy viloyatida — 671 ta holatni tashkil etmoqda.
Shu kuni Farg‘ona viloyati, Marg‘ilon shahar, Bog‘chasaroy ko‘chasida yashovchi 25 yoshli F.D. IIO xodimlarining qonuniy talablarini bajarmasdan karantin qoidalarini buzib, mast holatda mayda bezorilik sodir etgan.
Ularga nisbatan Ma’muriy javobgarlik to‘g‘risidagi kodeksning 54-modda (Epidemiyalarga qarshi kurash qoidalarini buzish), 183-modda (Mayda bezorilik), va 194-modda (Ichki ishlar organlari xodimining qonuniy talablarini bajarmaslik)lari asosida ma’muriy hujjatlar rasmiylashtirilib, 15 sutka ma’muriy qamoq jazosi tayinlangan.
Namangan viloyati Pop tumanida yashovchi 49 yoshli M.U. IIO xodimlarining qonuniy talablarini bajarmasdan karantin qoidalarini buzib, mast holatda mayda bezorilik sodir qilganligi uchun unga nisbatan Ma’muriy javobgarlik to‘g‘risidagi kodeksning 54, 183, va 194-moddalari asosida ma’muriy hujjatlar rasmiylashtirilib, 1 115 000 so‘m jarimaga tortilgan.
Eslatib o‘tamiz, koronavirus infeksiyasi tarqalishiga qarshi kurash doirasida Toshkent shahri va bir qator shaharlarga transportning kirish-chiqishi cheklandi, viloyatlararo transport harakati to‘xtatildi. Bundan tashqari, shaxsiy avtomobilda maxsus ruxsatnomasiz harakatlanish taqiqlandi, fuqarolarga zaruratsiz uydan chiqmaslik tavsiya etildi.
Shuningdek, 6-apreldan boshlab Toshkent shahrining 11 ta tumanidagi 514 ta mahalla qoshida karantin tartibini nazorat qiluvchi “Jamoatchilik nazorati maskani” tashkil etildi.
Izoh (0)