O‘zbekiston Markaziy bankining asosiy stavkasi 1 foiz bandga pasaytirilib, yillik 15 foiz darajasida belgilandi. Bu haqda Markaziy bank tomonidan xabar berildi.
Ma’lum qilinishicha, Markaziy bank boshqaruvining 2020-yil 14-apreldagi navbatdan tashqari yig‘ilishi qaroriga asosan Markaziy bankning asosiy stavkasi 1 foiz bandga pasaytirilib, yillik 15 foiz darajasida belgilandi.
Ushbu qaror bo‘yicha 15-aprel, chorshanba kuni, soat 11:00 da tashkil etiladigan Markaziy bank raisi ishtirokidagi onlayn brifingda batafsil ma’lumot beriladi.
Eslatib o‘tamiz, Markaziy bank 5-mart kuni o‘tkazilgan yig‘ilish qaroriga asosan asosiy stavkani 16 foiz darajasida o‘zgarishsiz qoldirgan edi. O‘zbekistonda Markaziy bankning asosiy stavkasi va foiz koridori 2020-yilning 1-yanvardan joriy etilgan.
Avvalroq O‘zbekiston Markaziy banki dollar kursining keskin o‘sgani sababini ma’lum qilgan edi. O‘zbekiston banklari 14-aprel kuni dollarni 9750—9840 so‘mdan sotib olib, 9850 so‘mdan sotishni boshladi.
Izoh (0)