APL eng zo‘r liga, “Enfild” eng yaxshi stadion. “Liverpul”ning yaponiyalik ilk futbolchisi Takumi Minamino intervyusi

Takumi Minamino — o‘zbekistonlik futbol muxlislariga juda ham yaxshi tanish nom.

Minamino Yaponiyaning turli yosh termalari bilan o‘zbekistonlik tengqurlariga qarshi o‘ynagani ko‘pchilikka ma’lum. 2019-yil 19-dekabrida yaponiyalik futbolchi “Liverpul” futbolchisiga aylandi. Takumi “Zalsburg”dagi o‘yinlari bilan Mersisayd klubi rahbarlarini o‘ziga qarata olgan va buni Chempionlar Ligasidagi yuzma-yuz bahslarda ham isbotlagandi. “Qizillar” Avstriya klubiga 7,25 million funt to‘lashdan qochmadi. Va jamoaning hujum chizig‘ini kuchaytirish salohiyatiga ega, ham yosh, ham iqtidorli futbolchiga ega bo‘ldi. 16-yanvarda 25 yoshni qarshi olgan Takumi butun dunyo bo‘ylab tarqalgan koronavirus sabab “Liverpul”da o‘zini ko‘rsatishga ulgurganicha yo‘q. O‘yinlar to‘xtatilgunga qadar Minamino Mersisayd klubi safida atigi 3 ta o‘yinda qatnashdi, xolos. O‘yinlar yo‘qligi, shuningdek, karantin vaziyatidan kelib chiqqan holda Takumining “Liverpul”ga kelgan vaqtdagi intervyusini “Daryo” o‘zbek tilida taqdim etishga qaror qildi.

Ha aytgancha, Minamino “Liverpul” safidagi yaponiyalik ilk futbolchi hisobalanadi.

— Nimalarni his qilayotgani haqida

“Liverpul” o‘yinchisi bo‘lish kaminaning orzusi edi. Ushbu vaqt yetib kelganidan judayam xursandman”.

— “Zalsburg”dagilar bilan xayrlashgani haqida

“Zalsburg” — men uchun juda ham muhim klub. U yerdagi jamoadoshlarim, bosh murabbiy hamda muxlislar bilan xayrlashishga ulgurdim.

— “Liverpul” muxlislari uni orziqib kutgani haqida

“Bu haqida juda ko‘p eshitdim, ko‘rdim. Ammo shunga qaramay xotirjam edim. “Liverpul” Yaponiyada juda ham mashhur klub. Har bir yapon futbolchisi ushbu jamoada to‘p tepishni orzu qiladi. Qaror qabul qilish uchun ko‘p vaqt talab etilmadi”.

— Zalsburgda Nabi Keyta (Nabi ham ayni damda “Liverpul” futbolchisi) bilan birga 1,5 yil o‘ynagani va Mersisaydga kelishdan oldin u bilan gaplashmagani haqida

“U bilan kelgunimcha gaplashganim yo‘q. U meni, men esa uni juda yaxshi bilaman. U bilan birga to‘p tepish imkoniyatini sabrsizlik bilan kutyapman”.

— APL haqida

“Dunyodagi eng kuchli ligalardan biri. Faoliyatim rivojlanishdan to‘xtamasa, bir kun kelib APLda o‘ynashim mumkinligini bilardim. Biroq hech qachon “Liverpul”da o‘ynayman deb o‘ylamagandim. Bundan juda ham xursandman”.

— Joriy mavsum “Zalsburg”da yaxshi o‘ynagani, “Liverpul” o‘yiniga mavsumning qolgan qismida ta’sir ko‘rsatishi mumkinligi haqida

“Jamoaning bir bo‘lagiga aylanishim, menga o‘zimni ko‘rsatish uchun imkoniyat berilishi bilanoq, jamoa, uning g‘alabalari, muvaffaqiyatlari uchun bor kuchimni ishga solaman. Hammasi haqiqatga aylanishi uchun barcha imkoniyatlardan foydalanishga tayyorman”.

— “Liverpul” hujum chizig‘idagi raqobatga tayyorligi haqida

“Bu yerda jahon darajasidagi futbolchilar ko‘p. Albatta, ular bilan raqobat qilish oson bo‘lmaydi. Oson emas, ammo chaqiruvlar tashlashga tayyorligimni ko‘rsatish juda muhim. Ayniqsa jamoa uchun. Men esa bunga tayyorman”.

— “Liverpul”ga qarshi joriy mavsum o‘ynagani, “Enfild” haqida

“Jamoa texnik jihatdan juda kuchli, jismoniy tarafdan esa kurashlarga tayyor. Futbolning yuqori darajasi. Bu bahslarda rostdan ham Chempionlar Ligasining amaldagi g‘olibiga qarshi o‘ynayotganligimni tushunganman. Yaponiyada “Enfild” haqida ham juda ko‘pchilik biladi. Atmosfer, tarixi va an’analari jihatidan qaralsa, “Enfild” o‘zgacha stadion. “Liverpul”ga qarshi “Enfild”dagi bahsni eslayman, atmosfera shunchaki fantastik edi”.

— Yurgen Klopp bilan birga ishlash haqida

“Birgalikdagi faoliyatimizni intizorlik bilan kutyapman. Mening ustunliklarimni bir shuki, Yurgen bilan nemischada gaplasha olaman. Klopp dunyodagi eng yaxshi murabbiylardan biri hisoblanadi. Men esa har doim o‘sishni, rivojlanishni xohlayman. Shunday ekan bu orqali jamoa rivojiga hissa qo‘sha olsam juda yaxshi ish bo‘lardi”.

— “Liverpul”dagi maqsadlari haqida

“APL va Chempionlar Ligasida g‘alaba qozonish. Shuningdek, jamoa rivojiga hissa qo‘shish. Bu asosiy maqsadlarim”.

— “Liverpul” muxlislariga tilaklari

“Intizorlik bilan “Enfild”da o‘ynash imkoniyatini kutyapman Shuningdek, muxlislar bilan uchrashuvlarni ham. Gollarim va golli uzatmalarim orqali jamoa muvaffaqiyatiga hissa qo‘shishni xohlardim. Shuningdek, o‘z his-tuyg‘ularimni muxlislar bilan bo‘lishadigan vaqtlarni kutyapman”.

Boshqa intervyu va maqolalar:

• Odil Ahmedov koronavirus, ko‘rshapalak va Xitoy taomlari, Kevin de Bryuyne hamda O‘zbekistonga qaytishi borasida
• Eldor Shomurodov Rostovdagi karantin, hayotidagi eng muhim shaxs va azaliy orzulari haqida
• Dars qoldirgani uchun tarsaki yegan, bolaligida futbol o‘ynash taqiqlangan, Ferrari, samolyotlardan voz kechgan Sadio Mane haqida
• Tanqidlar, xotirjamlik, Zidanning yordami va Kazemif haqida. “Real”ning 19 yoshli yangi yulduzi Vinisiusning katta intervyusi
• Chandiqli kishi. 2 yoshida og‘ir YTHga uchragan, keyinchalik islomni qabul qilgan Frank Riberi haqida
• 3 mingta jarohatni boshdan kechirgan, MMA’ni yoqtirmaydigan va kattalar uchun filmlarda rol ijro etishga majbur bo‘lgan Jeki Chan haqida