Qozog‘istonning Qizilo‘rda viloyatida yashovchi koronavirus bilan kasallangan homilador ayolning ko‘zi yoridi, chaqaloqdan COVID-19 tahlili olingan, deb xabar bermoqda “RIA Novosti” Favqulodda vaziyatlar bo‘yicha davlat komissiyasining tezkor shtab-kvartirasiga tayanib.

Foto: Facebook / Lyazat Meyrashevna Aktayeva

Mamlakat sog‘liqni saqlash vaziri o‘rinbosari Lyazat Aktayevaning so‘zlariga ko‘ra, ayol tug‘ruqxonaga to‘liq homiladorlik davri va o‘tkir respirator virusli infeksiya belgilari bilan qabul qilingan. Tekshirishlar vaqtida uning tana harorati 38,1 gacha ko‘tarilgan. COVID-19 tahlili unda virus borligini ko‘rsatgan.

Lyazat Aktayevaning aytishicha, chaqaloqning bo‘yi 51 santimetr va 2,9 kilogramm vazn bilan tug‘ilgan. Bolaning sog‘lig‘i shifokorlar tomonidan qoniqarli deb baholanmoqda, u inkubatorga joylashtirilgan. Onasining sog‘lig‘ini hisobga olgan holda chaqaloqdan ham koronavirusga tahlil olingan, natijasi kutilmoqda. Ayolning o‘zi esa davolanish uchun yuqumli kasalliklar statsionariga o‘tkazilgan.

Foto: Facebook / Lyazat Meyrashevna Aktayeva

Tug‘ruq jarayonini o‘tkazgan navbatchi shifokorlar guruhi kuchaytirilgan himoya vositalaridan foydalanganiga qaramay, navbatchilikdan so‘ng 2 haftalik uy karantiniga yuborilgan.

Avvalroq Qozog‘istonda birinchi marta homilador ayol koronavirusga chalingani xabar berilgandi. U ahvoli va kasallik qanday kechayotgani haqida gapirib bergan.

Ayni paytda dunyo bo‘yicha koronavirusga chalinganlar soni 1 million 601 ming kishidan oshgan. Qozog‘istonda kasallanganlar soni 802 kishiga, O‘zbekistonda esa 624 kishiga yetdi.