O‘zbekistonda avtomobil harakatlanishiga maxsus ruxsatnoma talab etilmaydigan holatlar ro‘yxati yangilandi

O‘zbekistonda koronavirusga qarshi kurash bo‘yicha respublika maxsus komissiyasi avtotransport vositalari harakatlanishiga maxsus ruxsatnomalar talab etilmaydigan holatlar ro‘yxatini yangiladi. Bu haqda Adliya vazirligi xabar berdi.

Ma’lum qilinishicha, 8-aprel kuni respublika maxsus komissiyasi avtomobildan foydalanishga ruxsat talab qilinmaydigan holatlarning yangi ro‘yxatini tasdiqlagan.

Quyidagi avtotransport vositalari harakatlanish uchun maxsus ruxsatnoma talab etilmaydigan holatlar ro‘yxatidan chiqarilgan:

• Prezident Administratsiyasi, Oliy Majlis palatalari, Vazirlar Mahkamasi, Milliy gvardiya, Davlat bojxona qo‘mitasi, Mudofaa vazirligi, Favqulodda vaziyatlar vazirligi, sud va prokuratura organlari shaxsiy avtotransport vositalari;
• Vazirliklar, davlat qo‘mitalari, agentliklar va boshqa davlat va xo‘jalik boshqaruvi organlarining tarkibidagi tashkilotlarning o‘rinbosarlarining xizmat avtotransport vositalari;
• Yo‘l-patrul xizmati avtomobillari yordamida kuzatilayotgan avtotransport vositalari.

Maxsus ruxsatnomasiz harakatlanishi mumkin bo‘lgan transport vositalari ro‘yxatiga quyidagilar kiritilgan:

• Xususiy tibbiy-sanitariya va epidemiologik xizmatlar ko‘rsatuvchi tashkilotlarning xizmat avtotransport vositalari;
• Bosh prokuratura huzuridagi Iqtisodiy jinoyatlarga qarshi kurashish departamenti xizmat va xodimlarning shaxsiy avtotransport vositalari;
• Qator qo‘mitalar, agentliklar, AJ, MChJ, DKlarga tegishli xizmat, yo‘lovchi tashuvchi (vaxta avtobuslari) va maxsus transport vositalari, tashkilotlar tomonidan tegishli ichki ishlar organlariga taqdim qilinadigan avtotransport vositalarning ro‘yxati va harakatlanish yo‘nalishi ko‘rsatilgan talabnoma asosida (ro‘yxatning 12-bandi);
• Qishloq xo‘jaligi texnikalari.

Shuningdek ro‘yxatga quyidagi o‘zgarishlar kiritildi:

• Tashkiliy-huquqiy shaklidan qat’i nazar, sog‘liqni saqlash tizimidagi tashkilotlar xizmat va xodimlarining shaxsiy avtotransport vositalari ro‘yxatdan chiqarilib, davlat sog‘liqni saqlash tizimidagi tibbiy-sanitariya va epidemiologik xizmatlar ko‘rsatuvchi tashkilotlarning xizmat va xodimlarining shaxsiy avtotransport vositalari qoldirildi;
• Kommunal xizmat ko‘rsatuvchi tashkilotlar — gaz, elektr energiyasi, issiqlik ta’minoti, sovuq suv, suvoqova va chiqindi tashishning xizmat avtomashinalari o‘rniga maxsus avtotransport vositalari;
• Xorijiy davlatlarning diplomatik vakolatxonalari va xalqaro tashkilotlar xizmat avtotransport vositalariga aniqlik kiritildi (ro‘yxatning 16-bandi).

Shuningdek, quyidagi avtotransport vositalarining 50 foizga qisqartirilgan ro‘yxati shakllantiriladi va ichki ishlar organlariga taqdim qilinadi (ushbu avtotransport vositalari tashkilot tomonidan berilgan ruxsatnoma asosida harakatlanadi):

• yo‘lovchi tashish faoliyati bilan shug‘ullanish litsenziyasiga ega bo‘lgan yo‘nalishsiz taksilar (yo‘lovchilarsiz, faqat yetkazib berish xizmatini ko‘rsatish maqsadida);
• Markaziy bank va uning hududiy boshqarmalari hamda tijorat banklarining xizmat avtotransport vositalari;
• aloqa xizmatlarini ko‘rsatuvchi tashkilotlar, “O‘zbekiston pochtasi”, “O‘zbektelekom” va uning tashkilotlari hamda “O‘zinfokom” yagona integratori»ning xizmat avtotransport vositalari.

Avvalroq O‘zbekistonda 2020-yil 9-apreldan boshlab avtotransport vositalari harakatlanishiga davlat xizmatlari markazlari tomonidan maxsus ruxsatnoma berish to‘xtatilgani haqida xabar berilgan edi.

Eslatib o‘tamiz, O‘zbekistonda viloyatlararo, Toshkent va Nukus shaharlari hamda viloyatlar markazlarida 30-mart soat 06:00 dan 20-aprel soat 00:01 ga qadar Davlat xizmatlari markazlari tomonidan beriladigan maxsus ruxsatnoma (stiker)lar asosida avtotransport vositalari harakatlanishiga ruxsat bergan. Maxsus ruxsatnomasiz harakatlangan fuqarolarga nisbatan Ma’muriy javobgarlik to‘g‘risidagi kodeksning 54-moddasi asosida jarima qo‘llaniladi, avtotransport vositasi karantin oxirigacha jarima maydonchasida qoladi.