Twitter asoschisi va kompaniya bosh direktori Jek Dorsi koronavirusga qarshi kurashish uchun 1 milliard dollar xayriya qildi. Bu haqda u ijtimoiy tarmoqdagi sahifasida ma’lum qildi.

U 1 milliard dollarni Square kompaniyasidagi ulushidan ajratishini, bu mablag‘ boyligining taxminan 28 foizini tashkil qilishini bildirgan. Twitter asoschisining ta’kidlashicha, pandemiya bartaraf etilganidan so‘ng qolgan mablag‘lar qizlarning sog‘lig‘i va ta’lim olishiga sarflanadi.

Dorsi uning bu xayriyasi oshkora qilinishini ta’kidlab, “O‘zim ham, boshqalar ham bundan xulosa chiqarishi uchun o‘z ishimni ko‘rsatishni muhim deb hisoblayman”, deb aytgan.

Microsoft asoschisi Bill Geyts fevral oyida Xitoyda koronavirusga qarshi kurashish uchun 100 million dollar ajratgan edi. Ushbu pullar Geyts xayriya fondi va uning turmush o‘rtog‘i Melindaga tegishli.

Amazon asoschisi va rahbari Jeff Bezos esa kompaniya 100 ming nafar yangi xodimlarni ishga yollab, soatbay to‘lanadigan ish haqini ko‘tarishini ma’lum qilgandi.

Apple rahbari Tim Kuk esa butun dunyo bo‘ylab koronavirus oqibatida kasallanganlarni davolashga 15 million dollar ajratgan.

Facebook Jahon sog‘liqni saqlash tashkilotining koronavirus haqidagi ma’lumotlarini bepul joylashtirib, targ‘ibot qilmoqda. Shuningdek, kompaniya vaziyat bo‘yicha so‘nggi xabarlarni WhatsApp orqali mintaqalarga yetkazib turish yo‘lida turli davlatlar hukumati bilan birgalikda hamkorlikni yo‘lga qo‘ygan.