IIV Jazoni ijro etish bosh boshqarmasi “Ozodlik” tomonidan “Mahbuslarni qamoqda qiynagani ortidan qamalgan ‘Palach’ning afv qilinish ehtimolidan faollar tashvishda” sarlavhasi ostida e’lon qilingan maqolaga munosabat bildirdi.
Navoiy viloyati 11-son jazoni ijro etish koloniyasida jazo muddatini o‘tayotgan mahkum Nozim Jumayev muqaddam og‘ir turdagi jinoyatlarni sodir qilganligi uchun 4 marotaba sudlanib, yana uyushgan jinoiy guruh tarkibida o‘ta og‘ir turdagi jinoyatni sodir etib, 20 yil muddatga ozodlikdan mahrum qilingan.Mahkum Nozim Jumayevga jazo muddatini o‘tayotgan boshqa mahkumlar qatori Jinoyat ijroiya kodeksida nazarda tutilgan shart-sharoitlar yaratilgan bo‘lib, alohida imtiyozlar yoki ma’lum bir yengilliklar berilmagan.
Mahkum uyushgan guruh tarkibida jinoyat sodir etganligi sababli unga nisbatan Jinoyat kodeksida ko‘rsatilgan muddatidan ilgari shartli ozod qilish yoki jazoni yengilrog‘i bilan almashtirish bilan bog‘liq bo‘lgan insonparvarlik dalolatnomalari qo‘llanilmaydi.
Bundan tashqari, mahkum Nozim Jumayev jazo muddatini o‘tash davomida muntazam ravishda belgilangan ichki tartib qoidalarni buzib kelganligi sababli unga nisbatan intizomiy jazo choralari qo‘llanilib, Jinoyat ijroiya kodeksining 112-moddasi talablariga muvofiq saqlash rejimini ashaddiy buzuvchi, deb topilgan. Navoiy shahar sudining 2019-yil 2-oktabrdagi ajrimiga ko‘ra uning jazoni o‘tash tartibi o‘zgartirilib, qattiq tartibli koloniyadan 3 yil muddatga turma tartibiga o‘tkazilgan.
O‘zbekiston Prezidentining afv etish to‘g‘risidagi farmon talablari asosida jinoyat sodir etgan shaxslar afv etishni so‘rab iltimosnoma bilan murojaat qilishga haqli, lekin mahkum Nozim Jumayev jazo muddatini o‘tash davomida afv etish to‘g‘risida iltimosnoma bilan murojaat qilmagan.
Maqolada keltirib o‘tilgan, ya’ni Navoiy viloyati Qiziltepa tumanidagi qamoqxona sobiq mahbuslardan biri (ismi sir qolishini istagan) “Ozodlik”ga aytishicha go‘yoki diabet kasaliga chalingan degan vaj bilan Jumayevga Navoiy viloyatidagi qattiq rejimli 64/46 koloniyada alohida yaxshi sharoit yaratib berilganligi holati yuzasidan quyidagilarni ta’kidlash lozim.
Jinoyat ijroiya qonunchiligiga muvofiq jazoni ijro etish koloniyalari umumiy, qattiq, maxsus va turma tartibli muassasalarga bo‘linib, jazo o‘tash shartlari bir-biridan farq qiladi hamda sud tomonidan umumiy tartibli koloniyalarda o‘tash belgilangan mahkumlar qattiq tartibli koloniyalarda jazo o‘tamaydilar.
Shu sababli Navoiy viloyati Qiziltepa tumanidagi 5-son koloniya umumiy tartibli bo‘lib, u yerda jazo muddatini o‘tagan shaxs 11-son (64/46) qattiq tartibli koloniya to‘g‘risida aniq ma’lumotga ega bo‘lmasdan fikr bildirganligini anglash mumkin.
Bundan tashqari, jazoni ijro etish tizim xodimlari jazoni ijro etish muassasalariga faqatgina o‘z xizmat vazifalarini bajarish uchun kelib, sport mashg‘ulotlari IIVning tegishli normativ hujjatlariga muvofiq hududiy ichki ishlar organlarida tashkil qilingan sport maydonchalarida o‘tkaziladi.
Amaldagi qonunchilikka muvofiq, advokatlar himoya ostidagi shaxslar bilan uchrashish jarayonida elektron vositalardan (mobil telefon, fotoapparat va diktofon) foydalanishlari mumkinligi qat’iy belgilangan bo‘lib, maqolada yoritilgan videolavhani mahkum Nozim Jumayev bilan uchrashuvga kelgan advokati tomonidan tasvirga olinganligini taxmin qilish mumkin.
Mazkur holat yuzasidan bugungi kunda Jazoni ijro etish bosh boshqarmasi tomonidan surushtiruv ishlari olib borilmoqda, uning natijasidan kelib chiqqan holda tegishli qaror qabul qilinadi.
Shuningdek, tekshiruv davomida sport bilan shug‘ullanayotganligi ko‘rinishdagi videolavha mahkum Jumayev ozodlikdan mahrum qilingunga qadar tasvirga olinganligi aniqlandi.
“Ozodlik” internet saytida e’lon qilingan maqolada IIV JIEBB axborot xizmati xodimi bilan suhbatlashganligi holati bo‘yicha shuni ta’kidlash lozimki, bugungi kunga qadar bosh boshqarma axborot xizmati xodimiga “Ozodlik” internet sayti muxbirlari biror marotaba murojaat bilan chiqmagan.
Maqolada ko‘rsatilgan holatlar ishonchli manbaga tayanmasdan bir tomonlana yondashgan holda ijtimoiy tarmoqlarda e’lon qilinganligi natijasida foydalanuvchilarda jazoni ijro etish tizimi bo‘yicha salbiy fikrlar paydo bo‘lishiga sabab bo‘lgan.
Yuqorida qayd etilganlardan kelib chiqqan holda Ichki ishlar vazirligi jazoni ijro etish bosh boshqarmasi maqolada keltirilgan holatlarni qat’iy ravishda rad etadi.
IIV JIEBB axborot xizmati
Izoh (0)