Dunyodagi eng yirik samolyot ishlab chiqaruvchi kompaniyalardan biri bo‘lgan Airbus shifokorlar uchun maxsus niqoblar — butun yuzni himoya qiladigan plastik ekranlar ishlab chiqarishni boshlaganini e’lon qildi.
“Kommersant”ning yozishicha, kompaniya bunday niqoblarni o‘zining Ispaniyadagi zavodlarida 20 dan ortiq 3D printer yordamida chop etadi. Niqoblar biologik parchalanadigan maxsus plastmassadan tayyorlangan.
Airbus’da yuzlab shunday niqoblar ishlab chiqarilgani, ular kompaniya zavodlari yaqinidagi kasalxonalarga yuborilgani qayd etilgan.
Koronavirus sharoitida zarur bo‘lgan turli himoya vositalari va moslamalar boshqa ko‘plab kompaniyalar tomonidan ham ishlab chiqarilmoqda. Balenciaga, Yves Saint Laurent va Ralph Lauren tibbiy niqoblar va himoya kiyimlari ishlab chiqarishni boshladi, LVMH o‘z zavodlarini qo‘l uchun antiseptik gellarni ishlab chiqarishni yo‘lga qo‘ydi, Britaniyaning maishiy elektronika ishlab chiqaruvchi Dyson kompaniyasi sog‘liqni saqlash xizmati mutaxassislari bilan hamkorlikda yangi sun’iy nafas oldirish apparatini yaratdi.
Virus tarqalishini real vaqt rejimida kuzatib boruvchi Jon Hopkins universiteti ma’lumotlariga ko‘ra, Ispaniyada COVID-19 koronavirusi bilan kasallanganlar soni 104 mingdan, vafot etganlar esa 9 ming kishidan oshib ketdi.
Izoh (0)