Namangan shahrida kasalxonalar va maxsus karantin zonalarida koronavirus infeksiyasiga chalingan bemorlar hamda karantinga olingan shaxslarga qarayotgan shifokor va hamshiralarning xonadonlari yo‘qlandi. Bu haqda “Daryo” muxbiri Azizbek Abduvaliyev xabar bermoqda.

Foto: Namangan shahar hokimligi axborot xizmati

Namangan shahar hokimligi tashabbusi bilan tashkil etilgan hamda un, go‘sht, yog‘, guruch, kartoshka va sabzi-piyoz, tibbiy niqob va qo‘lqoplardan iborat to‘plamlarni ortgan avtokarvon Namangan shahridagi 60 ga yaqin xonadonga yo‘l oldi.

Foto: Namangan shahar hokimligi axborot xizmati

Ular karantin tufayli kasalxonalarda o‘z burchini o‘tayotgan shifokor va hamshiralarning yaqinlariga topshirildi.

Foto: Namangan shahar hokimligi axborot xizmati

“20-mart kunidan beri kasalxonadan jilmadik. Lekin bundan noliydigan joyimiz yo‘q, chunki bu kasbni bila-turib tanlaganmiz. Yaratgandan o‘zimiz qarayotgan bemorlar tezroq sog‘ayib, oilalari bag‘riga qaytishlarini so‘raymiz. Yo‘qligimizni bildirmay, xonadonlarimizdan xabar olganlardan esa minnatdormiz”, — deydi telefon orqali muloqotda yuqumli kasalliklar shifoxonasi hamshirasi Matluba Akramova.

Foto: Namangan shahar hokimligi axborot xizmati

Ushbu shifoxonada ishlaydigan yana bir tibbiyot xodimi — Mahmuda Karimovaning xonadoniga borganimizda bizni maktabning yuqori sinfida o‘qiydigan qizi Munojot qarshiladi.

Foto: Namangan shahar hokimligi axborot xizmati

Uning ko‘ziga ilingan yoshdan bir haftadan beri uyga kelmayotgan onasini qattiq sog‘inganini payqash qiyin emasdi. Shunga qaramay, o‘zi ham kelgusida oyisi kabi shifokor bo‘lishni niyat qilganini aytadi.

Foto: Namangan shahar hokimligi axborot xizmati

Bugun kasalxonalar va karantin zonalarida qolayotgan tibbiyot xodimlarining yaqinlari bilan muloqot davomida ota-onalari, aka-ukalari, opa-singillari bilan nafaqat o‘zlari, balki barcha o‘zbekistonliklar faxrlanishi, fuqarolar mehnatlaridan rozi va minnatdor ekanliklari yetkazildi.