“Daryo” muxbirining xabar berishicha, 27-mart soat 17:00 dan boshlab Farg‘ona shahriga kirish-chiqish to‘xtatildi.
Mazkur chora aholi salomatligi uchun qo‘llanilgan bo‘lib, yuk tashish bilan bog‘liq hollarda, shuningdek, doimiy yashovchi shaxslarga nisbatan tatbiq etilmaydi.
Ta’kidlanishicha, mahalliy davlat hokimiyati organlari, huquq-tartibot idoralari, boshqarma, idora va tashkilot (nodavlat tashkilot) larda ishlovchi rahbar hamda xodimlar, shifokor va hamshiralar, davlat sanitariya va epidemiologik osoyishtalik markazi xodimlari, viloyat hokimining alohida topshirig‘iga asosan tumanlarga biriktirilgan mas’ul xodimlar viloyat bo‘ylab harakatlanishi mumkin.
Farg‘onada koronavirus infeksiyasi bilan kasallangan 8 nafar bemorning 5 nafari istiqomat qiluvchi Yozyovon tumanida esa karantin choralari kuchaytirilgan.
Prezident Shavkat Mirziyoyev raisligida 26-mart kuni o‘tkazilgan videoselektor yig‘ilishida Yozyovon tumanida yashovchi ayol Umra ziyoratidan qaytgach, ertasi kuni 120 nafar kishiga ziyofat bergani aytilgandi.
“Oqibatda uning to‘rt nafar oila a’zosi infeksiya yuqtirgani aniqlandi. Yana qancha odam kasallangani hali noma’lum”, — degan davlat rahbari.
Izoh (0)