ATK vazirligi internet va telefon 2 oy o‘chirilmasligi haqidagi xabarlarga rasmiy izoh berdi

O‘zbekistonda 24-martdan boshlab koronavirus infeksiyasi tarqalishiga qarshi kuchaytirilgan tartib joriy etilgani xabar berilgan edi. Bu haqda Vazirlar Mahkamasining 23-mart kuni qabul qilingan “Koronavirus infeksiyasi tarqalishiga qarshi qo‘shimcha chora-tadbirlar to‘g‘risida” qarorida belgilangan.

Unga ko‘ra, bir qator choralar amalga oshirildi. Jumladan, O‘zbekistonda 24-martdan boshlab fuqarolar tomonidan internet va telefon aloqasi uchun to‘lovlarni o‘z vaqtida amalga oshirmaganlik uchun 2 oy davomida o‘chirilishiga yo‘l qo‘yilmasligi belgilangan.

ATK vazirligi qaror bo‘yicha ko‘plab savol va murojaatlar kelib tushayotgani sababli mazkur masalaga izoh berib, aniqlik kiritdi.

Mazkur qarorga ko‘ra, litsenziya asosida faoliyat yuritayotgan telekommunikatsiya operatorlari va provayderlari, ikki oy davomida simli telefon aloqasi (xalqaro telefon so‘zlashuvlardan va mobil aloqasidan tashqari) hamda internet jahon axborot tarmog‘iga simli va simsiz ulanish xizmatlari uchun to‘lovlar o‘z vaqtida amalga oshirilmagan hollarda abonentlar tarmoqdan o‘chirilmasligi ta’minlanadi.

Shuningdek, qayd etilishicha, tashqi internet trafigi cheklangan tarif rejalarida limitdan tashqari trafik narxini arzonlashtirish imkoniyatlari o‘rganib chiqilmoqda. Respublikada uzluksiz aloqani ta’minlash va fuqarolarga imkoniyatlar yaratish maqsadida telekommunikatsiya operatorlari ham faol ishtirok etayotgani ta’kidlangan.

Xususan, O‘zbekistonda koronavirus bo‘yicha karantin rejimi e’lon qilingan vaqtdan boshlab barcha telekommunikatsiya operatorlari umumta’lim maktablari va maktabgacha ta’lim muassasalari tarbiyalanuvchilari uydan bemalol fanlarni o‘zlashtirish uchun Xalq ta’limi vazirligi portali, Respublika bolalar kutubxonasi veb-sayti, Muhammad al-Xorazmiy nomidagi ixtisoslashtirilgan maktab veb-portali, mahalliy videomanbaga , “ZiyoNET” ta’lim portali va  Edu Market, Online Maktab, MOOC kabi ta’lim manbalarining veb-saytlarga bepul kirishni ta’minlab berdi.

Fuqarolarni oxirgi yangiliklardan xabardor qilish maqsadida telekommunikatsiya operatorlari abonentlariga eng ko‘p o‘qiydigan ommaviy axborot vositalarining manbalaridan — daryo.uz, uzreport.news, xabar.uz, gazeta.uz, kun.uz, podrobno.uz, repost.uz, uznews.uz, spot.uz bepul foydalanish imkoni taqdim etildi.

Jamoatchilikni koronavirus to‘g‘risida xabardor qilish va tarqalishining oldini olish uchun amalga oshirilayotgan chora-tadbirlar haqida rasmiy veb-saytiga kirishi ham bepul qilingan. Mazkur manbada koronavirus haqida va O‘zbekistonda koronavirusga qarshi olib borilayotgan chora-tadbirlar to‘g‘risida obyektiv va ishonchli ma’lumotlarga ega bo‘lish mumkin.

O‘zbekistonda koronavirus masalasida ishonchli ma’lumotga ega bo‘lish uchun 16-martdan Toshkentda fuqarolarimizdan koronavirus infeksiyasi yuzasidan tug‘ilgan savollariga o‘z vaqtida javob olish maqsadida Sog‘liqni saqlash vazirligi Call-markazining qisqa “1003” yagona raqami 24 soat davomida ishlab turibdi. Fuqarolar tomonidan amalga oshiriladigan qo‘ng‘iroqlar barcha telekommunikatsiya operatorlari va provayderlari tomonidan respublikada bepul amalga oshirilmoqda.