Koronavirusga chalingan aktrisa Olga Kurilenko uyda davolanib, butunlay sog‘ayib ketganini ma’lum qildi

Koronavirusni yuqtirib olgan taniqli aktrisa Olga Kurilenko to‘liq sog‘ayganini ma’lum qildi. Aktrisa Instagram’dagi sahifasida o‘zini yaxshi his etayotganini yozib qoldirdi.

“O‘ylashimcha, men butunlay sog‘aydim. Kasallik qanday kechgani haqida qisqacha: Birinchi haftada o‘zimni juda yomon his etdim. Issig‘im baland edi, kuni bilan yotardim, ko‘p uxlardim. Men kechasi 12 soat uxlashimga qaramay, kunduzi yana 3-4 soat uxlardim. Joyimdan turishim qiyin edi. Ikkinchi hafta issig‘im tushib, yengil yo‘tal paydo bo‘ldi. Charchoq, holsizlik qoldi. Hozir hech qanday simptomlar yo‘q. Faqat ertalab biroz yo‘talaman, kun bo‘yi boshqa yo‘tal bezovta qilmaydi. Endi men o‘g‘lim bilan bemalol dam olishim mumkin. O‘zingizni ehtiyot qiling!”, — deb yozadi Olga Kurilenko.

https://www.instagram.com/p/B-DPRf1ha-q/

Avvalroq Olga Kurilenko davolanish jarayoni qanday kechayotganini so‘zlab bergandi. Aktrisa doktorlar unga hech qanday dorilar yozib bermagani, agar issig‘i ko‘tarilsa va qattiq og‘riq bo‘lsa, paratsetamol ichishni tayinlaganini, shuningdek, immunitetini kuchaytirish uchun vitaminlar ichayotganini ma’lum qilgandi.

Eslatib o‘tamiz, aktyor Tom Xenks va uning rafiqasi, “Taxtlar o‘yini” yulduzlari Indira Varma va Kristofer Xivyu, britaniyalik aktyor Idris Elba ham koronavirusni yuqtirib olgani xabar berilgandi.