Xorvatiyada besh balli magnitudadan kuchliroq ikkita kuchli zilzila ro‘y berdi, tongda kamida beshta silkinish kuzatilgan, deb xabar berdi Yevropa-O‘rtayer dengizi seysmologik markazining Twitter’dagi sahifasi.

Foto: France 24

5,3 magnitudali dastlabki silkinishlar Zagreb shahrida kuzatildi, zilzila episentri poytaxtga yaqin joyda, zilzila mahalliy vaqt bilan 06:24 da kuzatilgan. Oradan yarim soat vaqt o‘tgach yer silkinishi yana sodir bo‘lgan va uning magnitudasi ham 5 ball ekani qayd etilmoqda.

Foto: Gulf News

Silkinishlar oqibatida mamlakatdagi ayrim binolarning muayyan qismi buzilib tushgan, ko‘chalardagi avtomobillar ustiga binolar g‘ishtlari, qismlari qulab tushgan, ayrim turar joy hududlarida elektr ta’minoti o‘chib qolgan. Shuningdek, zilziladan Zagreb saroyi ham talafot ko‘rgan.

Foto: CP24

Shifokorlarning xabariga ko‘ra, tabiiy ofatdan bir nafar 15 yoshli o‘smirga shikast yetgan. Uni tez yordam guruhi ko‘chada jarohatlangan holda topgan, bolaning ahvoli og‘ir ekani aytilmoqda, — deyiladi The Dubrovnik Times xabarida.

Foto: Al Jazeera

Dastlabki uchta silkinishdan keyin Xorvatiyada yana uchta nisbatan kuchsiz zilzilalar kuzatilgan. Yer qimirlashining magnitudasi mahalliy vaqt bilan 07:41 da 3,7 ballni, 08:04 da 3,1 hamda 08:10 da 3 ballni tashkil etgan.

Foto: Croatia Week

Yanvar oxirida Turkiya sharqida Elazig viloyatida 6,8 balli kuchli zilzila sodir bo‘lgan. Oqibatda 41 nafar odam halok bo‘lgan, 1,6 mingdan ko‘proq odam jarohatlangan, xarobalar ostida 45 nafar odam qutqarib olingandi. Sivrije shahri episentrga yaqin bo‘lgani sabab zilziladan kuchli talafot ko‘rgandi. TIV Turkiyadagi zilzila oqibatida halok bo‘lganlar orasida O‘zbekiston fuqarolari yo‘qligini ma’lum qilgan.