Oliy ta’lim vazirligi karantin talabalarning yozgi ta’tili qisqarishiga ta’sir qilishi mumkinligini bildirdi

Oliy va o‘rta maxsus ta’lim vaziri o‘rinbosari Uzoqboy Begimqulov UzReport telekanalida efirga uzatilgan brifingda talabalarning o‘qishga qaytishi bugungi kundagi koronavirus infeksiyasi xavfi pasayib, dars o‘tish va jamoaviy tadbirlarni o‘tkazishga doir xavf-xatarlar bartaraf etilganidan keyin boshlanishini, bu jarayon, albatta OAV orqali tegishli vazirlik va idoralar tomonidan e’lon qilinishini bildirdi.

“Karantin sabab yozdagi ta’til muddati qisqarishi tabiiy, muddatning qancha bo‘lishi karantin sababli berilgan ta’tilning qancha davom etishiga bog‘liq.

Hozir navbatdan tashqari ta’til necha kunga cho‘zilishidan qat’i nazar, biz talabalarning masofaviy va mustaqil ta’lim olish orqali o‘quv dasturlarini o‘zlashtirishiga imkoniyat yaratib berayapmiz”, – dedi vazir o‘rinbosari.

15-mart kuni Koronavirus sabab O‘zbekistondagi barcha maktablar, bog‘chalar va OTMlar karantinga yopilgani e’lon qilingan. Toshkentda koronavirus sabab ta’tilga chiqqanlarga Talabalar shaharchasida ko‘chma kassa tashkil etilgan va viloyatlardan kelib poytaxtda tahsil olayotganlarning uyga qaytishiga bepul aksiyalar o‘tkazilib, kerakli sharoitlar yaratilgandi. Toshkentdagi barcha talabalar turar joylari 19-martdan to‘liq yopilib, dezinfeksiya qilina boshlangan.