Bugun, 19-mart kuni Toshkent metropolitenining Yunusobod liniyasidagi yangi stantsiyalarni ishga tushirishga tayyorgarlik ko‘rish maqsadida va texnik ishlar olib borilishi munosabati bilan mazkur yo‘nalish vaqtincha yopildi, deb xabar bermoqda Transport vazirligi axborot xizmati.
Bu haqda yo‘lovchilar murojaatlariga tayanib “Ko dnu” Telegram-kanali soat 09:04 da ma’lum qilgan. Vazirlik xabari esa bundan qariyb ikki soat o‘tib (10:55) e’lon qilingan.
Vazirlik vaqtinchalik noqulayliklar uchun uzr so‘rab, ushbu liniya qachon ochilishi haqida yaqin orada ma’lumot berishini ta’kidlagan.
“Ko dnu” kanali esa “Yo‘lovchilar oldindan ogohlantirildimi? Dublyor avtobus qo‘yish haqida o‘ylab ko‘rilmaydimi? Metro qachon ochilishi aytilmaydimi?”, degan savollarni o‘rtaga tashlagan.
O‘zbekiston temir yo‘llari matbuot xizmati 12:02 da harakat qayta tiklanganini ma’lum qilgan va bunday xabarlarni yorituvchi blogger va jurnalistlardan yangi obyektlarini qurishda texnik tomon bilan bog‘liq bunday rejalashtirilmagan choralar ko‘rilayotganini to‘g‘ri tushunishlarini va aholi o‘rtasida salbiy talqinlarni tarqatmaslikni so’ragan.
Izoh (0)