Donald Tramp koronavirusga qarshi kurashish maqsadida harbiy vakolatni zimmasiga olishga qaror qildi

Koronavirusga qarshi kurashishga bag‘ishlangan brifingda AQSh prezidenti Donald Tramp, niqoblar, respiratorlar va boshqa zarur jihozlarni ishlab chiqarishni ko‘paytirishga xizmat qiladigan mudofaa sanoati to‘g‘risidagi qonunni imzolashini ma’lum qildi, deb xabar beradi “RBK”.

“Biz ko‘zga ko‘rinmas dushmanni yengish uchun harakat qilmoqdamiz”, — deydi Tramp. Uning ta’kidlashicha, vujudga kelgan inqiroz uni “urush davri prezidenti”ga aylantirib qo‘ygan.

Trampning ma’lum qilishicha, chegaralar butkul yopilmaydi, biroq Qo‘shma Shtatlarning janubiy chegaralarini noqonuniy ravishda kesib o‘tmoqchi bo‘lgan migrantlarni chiqarib yuborish imkonini beradigan qonundan foydalanadi.

Bundan tashqari, prezident Nyu-Yorkdagi jabrlanuvchilarga yordam ko‘rsatish maqsadida gospital kemasini yuborish bo‘yicha topshiriq berdi, yana bir shu turdagi kema g‘arbiy qirg‘oqlardagi fuqarolarga yordam ko‘ratadi.

So‘nggi ma’lumotlarga ko‘ra, AQShda koronavirus bilan kasallanganlar soni 7752 kishiga, vafot etganlar soni 122 kishiga yetgan.

Eslatib o‘tamiz, AQShda yangi turdagi COVID-19 koronavirusining tarqalishi sabab Yevropa mamlakatlaridan keluvchilar uchun 30 kunga vaqtinchalik taqiq o‘rnatildi. Birozdan so‘ng Donald Tramp mamlakatda COVID-19 koronavirus infeksiyasi tarqalishi oqibatida favqulodda holat rejimi e’lon qilinganini bildirdi. Uning o‘zi ham koronavirusga test topshirdi. Trampda kasallik aniqlanmadi.