Qashqadaryo viloyati Transport boshqarmasi tashabbusi ortidan Samarqand viloyati hokimligi ham viloyatdan Toshkentga kelib o‘qiyotgan talabalarni uylariga bepul qaytarish bo‘ycha maxsus avtobus reyslari tashkil etmoqda. Bu haqda O‘zA xabar berdi.
Ma’lum qilinishicha, Samarqand viloyat hokimligi Toshkent shahrida tahsil olayotgan talaba-yoshlar hamda Toshkent shahrida bo‘lib turgan samarqandliklarni viloyatga qaytarish uchun maxsus avtobus reyslarini tashkil etmoqda.
Qayd etilishicha, 2020-yil 18-mart kuni soat 09:00 va 10:00 da “Toshkent” avtoboshbekatidan Samarqand shahriga homiylar ko‘magida bepul avtobuslar yo‘lga chiqadi.
Avvalroq, Oliy va o‘rta masxus ta’lim vazirligi Toshkentdagi OTMlarda 30 ming nafar talaba o‘zlari yashaydigan viloyatlarga jo‘nab ketganini hamda Toshkentdagi barcha talabalar turar joylari 19-martdan to‘liq yopilib, dezinfeksiya qilinishini ma’lum qilgan edi.
Eslatib o‘tamiz, koronavirus sabab O‘zbekistondagi barcha maktablar, bog‘chalar va OTMlar 2020-yil 16-martdan karantinga yopildi. Yo‘lovchilarni manzilga yetkazish uchun avtovokzaldan qo‘shimcha reyslar yo‘lga qo‘yila boshlandi. Shuningdek, “Toshkent” avtovokzali tun-u kun ishlash rejimiga o‘tdi.
Izoh (0)