Tibbiyot fanlari doktori, professor Shavkat Ahmedovning so‘zlariga ko‘ra, kirsovun – koronavirusga qarshi samarali vositalardan biri. U bu haqda “O‘zbekiston” telekanalidagi “Munosabat” ko‘rsatuvining 16-mart kuni bo‘lib o‘tgan sonidagi chiqishida aytib o‘tdi.

Foto: “Daryo”

“Vahima qiladigan narsa yo‘q. Sog‘lom turmush tarziga amal qilish kerak. Shaxsiy gigiyenaga rioya qilish kerak. Kerak bo‘lsa har soatda qo‘lni sovunlab yuvish kerak”, — dedi professor.

U shifokor sifatida ximiyalashgan hidli sovunni emas, balki kirsovunni tavsiya qilishini aytdi. “Aynan kirsovunda yuvish kerak. Iloji bo‘lsa, spirtlab turish kerak. Iloji bo‘lmasa, kirsovunni o‘zi ishqoriy muhit bilan foyda beradi”, — dedi professor Ahmedov.

Hozirda O‘zbekistonda sakkiz kishi  koronavirusga chalingan. Ular orasida og‘ir ahvoldagilar yo‘q. Bundan tashqari, 641 kishi kasalxonalarda, 5661 kishi esa uy sharoitida karantinga olingan.