Italiyaning Breshia shahrida shifokorlar 3D-printerda chop qilingan klapanlardan foydalanib, bemorlar hayotini saqlab qoldi. Bu haqda Milandagi FabLab ustaxonasi direktori Massimo Temporellining so‘zlariga asoslanib, TJournal xabar berdi.
Breshiadagi koronavirusni yuqtirgan 250 nafar bemor bo‘lgan shifoxonada reanimatsiya apparatlari uchun ishlatiladigan klapanlar tugab qoldi. Shifokorlar uskuna yetkazib beruvchilarga murojaat qildi, biroq ular uskunani tez orada yetkazib bera olmasligini aytdi.
Shunda shifokorlar mahalliy Giornale di Brescia nashri bilan bog‘lanib, yoradm so‘radi. Gazeta esa texnologik loyihalarda hamkorlik qilgan Temporeli bilan maslahatlashdi. Temporeli mahalliy kompaniyalarga qo‘ng‘iroq qilib, kasalxonaga kim yordam bera olishi mumkinligini aniqlashga urindi. Isinnova kompaniyasi asoschisi Kristian Frakassi ushbu so‘rovga javob qaytardi va kasalxonaga 3D-printer olib keldi.
Qayd etilishicha, uskuna yetkazib beruvchi kompaniya kasalxonaga klapanlar chizmasini taqdim etishdan bosh tortgan. Bu esa ishni biroz qiyinlashtirgan. Shunga qaramay tizim ishlab ketgan va chop qilingan klapanlar o‘nlab insonlar hayotini saqlab qolgan.
Keyinroq Isinnova kompaniyasiga mahalliy Lonati kompaniyasi ham yordam berib, yuzga yaqin klapanlarni chop etgan.
Shundan so‘ng Temporelliga 3D-printerga ega boshqa kompaniyalar ham murojaat qilib, yordam berish istagini bildirgan. Biroq Fablab direktorining so‘zlariga ko‘ra, kasalxonaga klapanlar boshqa kerak emas.
Frakassi ham ushbu vaziyatda jamoasida tanlash imkoni bo‘lmagani, yordam haqidagi taklifni rad etish “qotillik akti” bo‘lishi mumkinligini aytib o‘tgan.
U shuningdek, o‘zi va jamoasini daho yoki qahramon deb atamasliklarini hamda “haqiqiy qahramonlar” — shifokorlarga urg‘u berish kerakligini ta’kidlagan.
Avvalroq Italiyada koronavirusdan bir sutkada qariyb 350 kishi vafot etgani haqida xabar berilgan edi.
Mamlakatda koronavirus tarqalishi boshlanganidan beri kasallikdan jami 2158 nafar odam vafot etgan. Oxirgi bir sutkada 414 nafar odam koronavirusdan tuzalgan. Sog‘aygan bemorlarning umumiy soni 2,7 mingni tashkil etmoqda.
Mavzuga doir:
- O‘zbekistonda koronavirusga chalingan fuqarolar soni 10 kishiga yetdi. Bemorlar ahvoli hozircha qoniqarli
- JSST: Bir sutkada dunyo bo‘yicha koronavirus bilan kasallanganlar soni salkam 14 mingtaga ko‘paydi
- O‘zbekistonlik professor: Koronavirus profilaktikasida atir sovundan ko‘ra kirsovun samaraliroq
- “Dunyoning eng boy kishilari bu kasallikdan qutula olmadimi, unda biz ham tayyor turishimiz kerak”. Kanadadagi o‘zbekistonlik koronavirus haqida
Izoh (0)