Rossiyadan qochgan “GTA to‘dasi” a’zosi Boir G‘ulomov va Murodjon Karimov Tojikistonda 25 yil qamoq jazosiga hukm qilindi. Meduza’ning yozishicha, bu haqda Rossiya Bosh prokuraturasi xabar berdi.
Qayd etilishicha, Boir G‘ulomov va Murodjon Karimovga nisbatan hukm Tojikistonning So‘g‘d viloyati sudi tomonidan chiqargan. Ular Rossiyada qurolli guruhda ishtirok etish, odam o‘ldirish, talonchilik va boshqa jinoyatlarda aybdor deb topilgan.
Boir G‘ulomov va Murodjon Karimov “GTA to‘dasi”ning boshqa a’zolari qo‘lga olinganidan so‘ng Rossiyada qochib ketgan. Ular 2014-yilning oxirlarida Tojikistonda qo‘lga olingan va Tojikiston fuqarolari bo‘lgani uchun Rossiyaga yuborilmay, vatanida hukm qilingan.
“GTA to‘dasi” 2012—2014-yillarda Moskva va Kaluga viloyatlarida avtomobillarga hujum qilgan. Tergovga ko‘ra, to‘dada kamida 15 nafar O‘rta Osiyo mamlakatlaridan kelgan muhojirlar bo‘lib, ular 17 kishini o‘ldirgan va yana ikki kishini yaralagan.
2017-yilda “GTA to‘dasi” ishida ishtirok etgan besh kishi Moskva viloyat sudidagi konvoirga hujum qilib, ularning qurollarini tortib olgan. Tajovuzkorlarning to‘rt nafari halok bo‘ldi. Qochishga urinish ishi bo‘yicha to‘rt nafar konvoir shartli qamoq jazosiga hukm qilingan.
2018-yilda Moskva viloyat sudi “GTA to‘dasi”ning omon qolgan a’zolariga hukm chiqardi. Voqea figurantlarining to‘rt nafari umrbod qamoq jazosiga, beshinchisi esa 20 yil qamoq jazosiga hukm qilingan.
Izoh (0)