“Yuventus” klubi “Real” bosh murabbiyi Zinedin Zidanni jamoa boshqaruviga olib kelmoqchi, deya xabar qilmoqda Daily Mail.
Ta’kidlanishicha, turinliklar Zidanga yiliga 7 million yevro maoshga ega uch mavsumlik shartnoma taklif qilishga tayyor.
“Yuventus” prezidenti Andrea Anyelli fransiyalik mutaxassis bilan iliq munosabatlarni saqlab qolgan. O‘z navbatida Zidan “keksa sinyora” taklifini o‘rganib chiqmoqda.
Manbada keltirilishicha, Zidan va “Real” prezidenti Florentino Peres bir-birini hurmat qiladi, biroq bir qator futbolchilarning noroziligi tufayli yozda shartnoma bekor qilinishi mumkin.
Zidanning fikriga ko‘ra, “Yuventus” uning tashrifidan keyin bir qator yulduz futbolchilarni olib kelish va yangi hamkorlarni jalb qilish imkoniyatiga ega bo‘ladi. Turinliklar ham Zidan timsolida Yevropa Chempionlar Ligasi g‘olibligini olib kela oladigan mutaxassisni ko‘rmoqda.
Zidanning “Real” bilan amaldagi shartnomasi 2022-yilga qadar mo‘ljallangan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)