Hurgadaning hamyurtlarimiz uchun qanday qiziqarli jihatlari bor?
Hurgada Misrdagi qizil dengiz sohilidagi 26 provinsiyalardan biri — Qizil dengizning ma’muriy markazi sanaladi. U yerda ilk mehmonxonalar 20 yillar muqaddam qad rostlay boshlagan. Avvalo aytish mumkinki, yozda oila a’zolari bilan osuda, xavfsiz, nihoyatda xushmanzara, bir qator ekskursiyalardan tarkib topgan hamda narx borasida birmuncha qulay joyda dam olishni ko‘nglingizga tugib qo‘ygan bo‘lsangiz, aynan ushbu kurort sizga ma’qul kelishi aniq.
Eski (El-Dahar) va yangi (Sakkala) markazlardan iborat shahardan boshlangan mehmonxonalar tarmoqlari shimol va janubga qariyb 40 km masofaga cho‘ziladi. Uning ustunlik tomonlari juda ko‘p:
- yilning istalgan faslidagi quruq ob-havo. Namlik darajasi 30-40% dan ortmaydi. Yozning qoq jaziramasida ham bu yerda soyabon ostida bemalol dam olish mumkin;
Plyajlarda qumdan yurib dengiz suviga tushish imkoniyati. Misrning aksariyat kurortlarida dengizga tushish oldidan korall riflari yoki ulardan yo‘nilgan o‘tish yo‘laklariga duch kelasiz. Bu esa bolajonlarning shikast olish ehtimolini oshiradi. Aynan shu sababli ham Hurgada oilaviy hordiqlar uchun mukammal manzil hisoblanadi.
Bolalar bilan bu yerda dam olishning afzalliklaridan biri ko‘plab mehmonxona hamda restoranlarda o‘yin xonalari va maxsus menyular bor. Aksariyat plyajlarda quvnoq karusellar, suvli sirpanchiqlar mavjud. Hurgadadagi akvariumda baliqlarning boy kolleksiyasini ko‘rish mumkin: masxaraboz baliq, jarroh baliq, murena, dengiz otchasi, sakkizoyoq, koral, dengiz yulduzi, aktiniya – jami 300 xildan ortiq jonivorlar suzib yurishadi
Devorlari va shiftlari shaffof binolardan esa qaynab turgan hayot tarzini tomosha qilish imkoniyati bor. Buning ustiga haqiqiy sharqona muhitni his qilish uchun sayyohlarga “Ming bir kecha” qasriga borib kechki tomoshaning guvohi bo‘lish tavsiya etiladi. Bunday dasturni ko‘rgan har qanday mehmon o‘zini shayxlarning qasridagi qadimiy asrlar silsilasiga tushib qolgandek sezadi.
All inclusive tizimida, ya’ni barcha xizmatlarni taqdim etuvchi besh va to‘rt yulduzli mehmonxonalar, bolalar uchun akvaparklar, mahoratli animatorlarning chiqishlaridan iborat kechki shou-dasturlari, oilaviy hordiq chiqarishga mo‘ljallangan, rivojlangan infratuzilma, boshqa kurortlarga nisbatan ko‘proq ekskursiyalar.
Hurgadada sayyohlarga taklif etiladigan ekskursiya dasturlari turlicha. Kun bo‘yi tarixiy qadamjolar: shimolda joylashgan Qohira shahridagi piramidalar yoki janubdagi Luksorning kanakskom, ibodatxonalari, Shohlar vodiysida sayr qilish mumkin. Dunyoga dong‘i ketgan piramidalar, sfinkslarning sehrli, ajabtovur olami kurort yaqinida joylashgani sizni bot-bot u yerga borib kelishga undaydi.
Faol hordiqni xush ko‘ruvchilarga esa dayving, serfing, kvadrasikllardagi poygalar, sportning suvmotor turlari taklif etiladi. Korall orollari bo‘ylab sayohat qilish, maxsus suvosti qayiqlarida sho‘ng‘ish mumkin.
Hurgadaning El Guna, Makadi, Soama, Safaga kabi kurort hududlari mavjud. Ularning har biri o‘zgacha manzara hamda qulayliklar, ko‘ngilxushliklarni taqdim qiladi.
Hurgadada qiziqarli suvenirlar, sifatli charm mahsulotlari, xonadon interyeriga kerakli yoqimli buyumlar yoki zamonaviy uslubdagi kiyim-kechaklar xarid qilish mumkin bo‘lgan ulkan miqdordagi joylar bor. Vaqtingiz va pulingizni sarflamaslik uchun ularning eng mashhur hamda hamyonboplarini bilib olganingiz ma’qul. Senzo Mall, Sheraton, Levis, Jackie B, Pharaoh, Hurghada Marina Boulevard, El-Baraka, El-Mamsha, Hurgada bozori kabi savdo markazlarida keng turdagi mahsulotlar, buyumlarni sotib olish mumkin.
Birgina mashhur Senzo Mall savdo markazining o‘zida dunyoga mashhur brendlarning bir qanchasi: Waikiki, Mango, Carina, Roxy, Clue, Quiz, Terranova va boshqalar tomonidan oilangizning barcha vakillari uchun eng arzon hamda hamyonbop keng turdagi buyumlar taklif etiladi.
Oilaviy tarzda xotirjam, unutilmas hordiq olishni istagan o‘zbekistonlik sayyohlar uchun Hurgada haqiqiy topilmaga aylanishini taxmin qilish mumkin.
Izoh (0)