Rossiyaning Sankt-Peterburg shahrida Mechnikov nomidagi davlat shimoli-g‘arbiy tibbiyot universitetining 700 nafardan ortiq talabasi karantinga olindi. Bunga italiyalik talabada koronavirus kuzatilgani sabab bo‘lgan, deb yozmoqda “RBK”.
Universitet ilm-fan va innovatsion faoliyat masalalari bo‘yicha prorektori Aleksey Silinning so‘zlariga ko‘ra, talabaning isitmasi ko‘tarilgach, ma’muriyat tezkor choralarni ko‘rgan va u Botkin nomidagi kasalxonaga o‘tkazilgan.
“Shundan keyin ‘Rosbotrebnadzor’ karantin chora-tadbirlarini amalga oshirish bo‘yicha ko‘rsatma berdi va biz kechadan boshlab barcha ishlarni amalga oshirdik. Karantinga olingan hudud ichkarisiga odamlar kiritilmayapti”, — degan prorektor.
Shunindek, Botkin kasalxonasiga yuborilgan italiyalik talaba bilan birga yotoqxonada yashagan boshqa yoshlar ham karantinga olingan. Prorektorning “Interfaks” agentligiga ma’lum qilishicha, talabalar yotoqxonada yashaydiganlar smenalardan qaytgan va ularning karantinga olinishi muvofiqlashtirib borilmoqda. Silinning aytishicha, bu OTMda o‘qiydiganlarning 20 foiz qismini tashkil qiladi.
“Rospotrebnadzor” garchi xorijlik talaba darslarda ishtirok etmagan bo‘lsa ham, uning boshqalar bilan muloqotda bo‘lganini taxmin qilgan.
Rikardo ismli talaba 29-fevralda Sankt-Peterburgga kelgan. Aeroportda uning tana harorati o‘lchanganida hammasi me’yorda ekani ma’lum bo‘lgan. Talabadagi kasallik alomatlari oradan bir nech kun o‘tgach ko‘zga tashlangan, shundan so‘ng nafaqat u, balki uni kutib olgan boshqa talabalar ham kasalxonaga olib ketib tekshirilgan. Ularda ham virus kuzatilmagan.
Italiya fuqarosidagi kasallik koronavirusning yengil formasi hisoblanadi.
Italiyaning Rossiyadagi bosh konsulligi Sankt-Peterburgdagi fuqaroda koronavirus kuzatilganini rasman tasdiqlagan.
“Ayni vaqtda ushbu hodisa bemorning sog‘lig‘iga xavf solayotgani yo‘q va u maxsus muassasada karantinga olingan. Maxfiylikni ta’minlash maqsadida bu borada batafsil ma’lumot bera olmaymiz”, — deyilgan konsullik ma’lumotida.
Rossiyada koronavirus bilan kasallanishning ilk holatlari yanvar oxirida Tyumen viloyati va Baykalorti o‘lkasida kuzatilgan, ikkala bemor ham Xitoy fuqarolari bo‘lgandi. Fevral oxirida Diamond Princess kruiz laynerida uch nafar rossiyalikda koronavirus kuzatilgan. Yana bir holat 2-mart kuni Italiyadan qaytgan rossiyalikda qayd etilgan.
Izoh (0)