Qirg‘izistondan o‘qishni ko‘chirish evaziga 4000 dollar olayotgan Andijon davlat universitetining 2 o‘qituvchisi qo‘lga olindi

Andijon davlat universiteti va Andijon davlat tibbiyot institutlarida qo‘shni davlatlardan o‘qishini O‘zbekistonga ko‘chirmoqchi bo‘lgan fuqarolar uchun pora evaziga yordam bermoqchi bo‘lgan shaxslar aniqlandi, deb xabar berdi Bosh prokuratura matbuot xizmati.

Xususan, Andijon davlat universiteti kafedra dotsenti L.R. fuqarolar M.M. va F.A.ni Qirg‘izistonda ta’lim olayotganligi haqida soxta hujjat tayyorlab, universitetga ko‘chirish uchun 4000 AQSh dollari olayotganida ushlangan. Yana bir fuqaro O.R. ushbu universitetdagi mansabdor tanishlari orqali Qirg‘izistonda ta’lim olayotgan talabaning o‘qishini ko‘chirish uchun 200 AQSh dollarini olayotganida ushlangan.

Andijon Davlat tibbiyot instituti talabalari Z.N. va Sh.S. Qirg‘izistonda ta’lim olayotgan yana bir fuqaroning o‘qishini o‘zlarining ta’lim muassasasi mansabdor shaxslari orqali ko‘chirib berishni va’da qilib, 2 000 AQSh dollarini pora tariqasida olayotgan vaqtda ashyoviy dalillar bilan ushlangan.