Jahon bo‘yicha koronavirus infeksiyasi bilan kasallanganlar soni 100 ming kishiga yaqinlashdi, vafot etganlar esa 3 mingdan oshdi. Xitoy koronavirusi bo‘yicha 6-martning asosiy xabarlari.
Kasallanganlar va vafot etganlar
Xitoy Sog‘liqni saqlash milliy komissiyasi ma’lumotiga ko‘ra, 6-mart, juma kuni, Xitoyda koronavirusga chalingan 143 kishi qayd etilib, kasallik oqibatida vafot etayotganlar soni esa 30 kishigacha kamaygan. Umumiy hisobda Xitoyda 80 552 kishida koronavirus aniqlangan. Mamlakat bo‘ylab kasallik oqibatida vafot etganlarning umumiy soni 3042 kishini tashkil etmoqda.Xitoyda koronavirusdan davolanishga muvaffaq bo‘lganlar soni 53 726 kishiga yetib, ularga shifoxonadan javob berilgani haqida xabar berildi.
South China Morning Post’ning ma’lumotlariga ko‘ra, jahonning boshqa davlatlarida 2098 kishida koronavirus aniqlanib, kasallikni yuqtirib olganlarning jami soni 99 805 mingdan oshib ketdi.
Koronavirus Xitoydan tashqari dunyoning 85 mamlakatida tarqalgan, yuqtirib olganlar soni esa 14,7 ming kishidan oshib ketdi.
O‘qishni qat’iy tavsiya qilamiz: Tomoshabinlarsiz o‘tgan konsert, fermerga qo‘ng‘iroq qilgan Mirziyoyev, vertolyotda uchgan bug‘ular
So‘nggi bir kun ichida Italiyada koronavirus qurbonlari soni 148 kishiga yetdi. 5-mart holatiga ko‘ra, mamlakatda umumiy hisobda 3 296 kishi kasallangan. Shuningdek, Vatikanda ilk marta koronavirus bilan kasallanish holati aniqlandi.
Fransiyada deputat koronavirusga chalindi. U og‘ir ahvolda kasalxonaga yotqizildi. Ma’lum bo‘lishicha, Jan-Lyuk Reytser 25-fevral kuni o‘tkazilgan parlament yig‘ilishida bo‘lgan. Kasallik parlament bufeti xodimida aniqlangan. U uy karantinida saqlanmoqda.
O‘zbekistondagi vaziyat
O‘zbekistonda maktab o‘quvchilari koronavirus tufayli 15-martdan ta’tilga chiqishi haqidagi xabarga aniqlik kiritildi. Qayd etilishicha, o‘quvchilar o‘tgan yillarda bo‘lganidek 21-mart kunidan navbatdagi ta’tilga chiqadi. Ta’til yetti kun davom etadi.Sog‘liqni saqlash vazirligi Vazirlar Mahkamasida bosh vazir o‘rinbosari Aziz Abduhakimov boshchiligida mamlakatga koronavirus kirib kelishi va tarqalishining oldini olish bo‘yicha respublika maxsus komissiyasi a’zolari ishtirokida videoselektor yig‘ilishi bo‘lib o‘tgani haqida xabar berdi.
Oliy Majlis Qonunchilik palatasi deputati, “Yuksalish“ umummilliy harakati raisining o‘rinbosari Bobur Bekmurodov koronavirus xavfining oshib borayotgani sababli O‘zbekistondan tibbiy niqoblarni eksport qilishni taqiqlashni taklif qildi. “Ortiqcha vahimaga hojat yo‘q, lekin yangi koronavirus bilan kasallanish holatlari 70 dan ziyod davlatda tasdiqlandi va kasallanganlar soni 100 mingga yaqinlashib qoldi. Globalizatsiya sharoitida virusdan izolyatsiyada qolish imkoniyati mavjud emasligi tobora oydinlashib bormoqda”, — deb yozadi deputat.
O‘zbekiston Tashqi ishlar vazirligi 1-martdan boshlab Tehron shahridagi O‘zbekiston elchixonasi huzurida ishchi guruh tuzilgani, u Eronda koronavirus tarqalishi bilan bog‘liq epidemiologik vaziyat barqarorlashguniga qadar tun-u kun faoliyat yuritishini ma’lum qildi. Eronda ayni paytda 50 nafar O‘zbekiston fuqarosi bor.
Shuningdek, Tashqi ishlar vazirligi Italiyaning Rim shahridagi elchixonasi huzurida operativ shtab tuzilgani haqida xabar berdi. 6-mart, juma kuni, ertalabki holatga ko‘ra, Italiyada O‘zbekiston fuqarolari orasida koronavirus yuqtirganlar qayd etilmagan.
“O‘zbekiston pochtasi” koronavirus sabab Xitoydan pochta jo‘natmalari kechikib kelishidan ogohlantirdi. Kechikishlarga asosan ushbu davlat bilan havo transporti parvozlarining vaqtincha to‘xtatilishi sabab bo‘layotganligi aytilmoqda.
Turoperatorlar koronavirus tufayli O‘zbekistonda soliq ta’tili e’lon qilishni taklif qildi.
Jahondagi vaziyat
O‘qishni qat’iy tavsiya qilamiz: Iqtisodiyot, siyosat va koronavirus: Xitoyning muvozanati buzilyaptimi?
Saudiya Arabistoni podshohligi koronavirus tarqalishining oldini olish maqsadida mamlakat fuqarolari va doimiy istiqomat qiluvchi xorijliklar (rezidentlar)ga ham Umra amalini taqiqlash to‘g‘risida qaror qabul qilgani haqida xabar berilgandi.
Shu munosabat bilan Ka’ba tavof etiladigan asosiy maydonga ziyoratchilarning kirishi cheklangan. Cheklov Umraga ruxsat berilguniga qadar amalda bo‘lishi aytilmoqda.
Tojikistonda koronavirus sababli masjidlar yopilgani, maktablar esa yopilmagani sababi tushuntirildi. 4-mart, chorshanba kuni, Tojikiston ulamolari kengashi imom-xatiblarga masjidlarda jamoat namozlarini vaqtincha o‘tkazmaslik tavsiyasi bilan murojaat qilgan. Shundan keyin respublikadagi barcha masjidlar yopilgan.
Falastin prezidenti koronavirus tufayli mamlakatda favqulodda holat e’lon qildi.
Moskva meri Sergey Sobyanin tegishli qaror bilan shaharda koronavirus tarqalishi xavfi sabab yuqori shaylik rejimini joriy etdi. Qarorda ko‘rsatilishicha, Xitoy, Janubiy Koreya, Italiya, Eron, Fransiya, Germaniya va Ispaniyaga borib-qaytgan fuqarolar 14 kun davomida o‘zlarini uy sharoitida mustaqil izolyatsiya qilishi kerak — ishga, o‘qishga va jamoat joylariga borishdan tiyilishlari lozim.
Sankt-Peterburgdagi Mechnikov nomidagi davlat tibbiyot universitetining 700 nafardan ortiq talabasi karantinga olindi. Bunga italiyalik talabada koronavirus kuzatilgani sabab bo‘lgan. Universitet prorektorining so‘zlariga ko‘ra, talabaning isitmasi ko‘tarilgach, ma’muriyat tezkor choralarni ko‘rgan va italiyalik talaba kasalxonaga yotqizilgan. “Shundan keyin ‘Rosbotrebnadzor’ karantin chora-tadbirlarini amalga oshirish bo‘yicha ko‘rsatma berdi va biz kechadan boshlab barcha ishlarni amalga oshirdik. Karantinga olingan hudud ichkarisiga odamlar kiritilmayapti”, — degan prorektor.
Koronavirus epidemiyasi uch mingdan ortiq odamning o‘limiga, fond bozorlarining qulashiga va chegaralarning yopilishiga sabab bo‘ldi, bundan tashqari xarid vahimasini ham keltirib chiqardi. Fevralda Osiyoda boshlangan vahima, virusning tarqalishidan kelib chiqib, asta-sekin Yevropa va Shimoliy Amerikaga ham ko‘chdi. Butun dunyo bo‘ylab odamlar mahsulot taqchiligi yuz berishidan xavotirlanib, hojatxona qog‘ozi, dezinfeksiya vositalari, dori va oziq-ovqat zaxirasini yaratib qo‘yay deb, do‘kon peshtaxtalarini bo‘shatib tashlayapti.
Britaniyaning Flybe aviakompaniyasi koronavirus sabab inqirozga uchradi. U yiliga 8 million nafar yo‘lovchiga xizmat ko‘rsatardi.
Fransiya prezidenti Emmanuel Makron Fransiyada COVID-19 koronavirusining tarqalishi epidemiyaga aylanishi muqarrar ekanligini aytgan.
Italiya moliyaviy gvardiyasi “Koronavirus-shop” deya ataluvchi kasallikdan himoya vositalarini sotadigan do‘konni yopdi. “Koronavirus-shop”da qimmat narxlarda virusdan himoya vositalari, jumladan, ionizatorlar, niqoblar, kombinzonlar, ko‘zoynaklar, qo‘lqop, dezinfeksiya vositalari, respiratorlar, bioqo‘shimchalar va boshqa buyumlar 1000 yevrodan sotilgan.
“Inter” klubi Milan shahridagi koronavirusni o‘rganish ishlari olib borayotgan “Luiji Sakko” shifoxonasining biotibbiyot tadqiqotlar o‘tkazuvchi bo‘limiga 100 ming yevro xayriya qildi.
Izoh (0)